Дьокуускайга санитарнай-эпидемиологическай нуорманы кэспит кафены саптылар

Дьокуускайга санитарнай-эпидемиологическай ирдэбили кэспит  биир кафе үлэтин үс ыйга тохтоттулар. Бу туһунан Саха сиринээҕи ФССП управлениетын пресс-сулууспата иһитиннэрэр.

Ол курдук, Роспотребнадзор бэрэбиэркэлиир кэмигэр иһит-хомуос кирдээх, холодильникка ааспыт күннээҕи макарон уонна гречка хараллан турбуттара,  дьон-сэргэ аһыыр саалатыгар таракаан булуллубут, ону таһынан биир эрэ үлэһиккэ мэдииссинэ киниискэтэ баара биллибит. Суут 26 саастаах урбаанньыты буруйдааҕынан билиннэ уонна кафе үлэтин тохтоторго уураахтаата.

Суут бириистэптэрэ административнай кэһии туһунан боротокуол толордулар уонна кафены саптылар. Санатан эттэххэ, бу күннэргэ Дьокуускайга шаурма атыылыыр түөрт туочука үлэтин тохтоппуттара.