Дьокуускайга сарсыҥҥыттан трофейнай байыаннай тиэхиньикэ быыстапката үлэлиэҕэ

Байыаннай дьайыы кэмигэр Арассыыйа байыаннайдара былдьаабыт трофейнай байыаннай тиэхиньикэлэрин быыстапката Дьокуускай куорат «Арассыыйа – мин устуоруйам» историческай паарка аттыгар  сэтинньи 2 күнүттэн сарсыарда 9:00 чаастан киэһэ 18:00 чааска диэри  үлэлиэ.

Оттон тиэхиньикэ экспозициятын аһыллыытыгар аналлаах митинг сэтинньи 4 күнүгэр күнүс 14:00 чааска буолуо, диэн www.sakha.gov.ru иһитиннэрэр.

Бу туһунан историческай паарка дириэктэрэ Дмитрий Соловьев иһитиннэрдэ. «Быыстапка “Норуот уонна аармыйа биир сомоҕо” III Өрөспүүбүлүкэтээҕи Фашизмы утары пуорум чэрчитинэн арыллыаҕа. Биһиги дойдубутугар маннык биир эрэ быыстапка үлэлиир – Москва куорат “Патриот” пааркатыгар. Иккис экспозиция биһиэхэ, Саха сиригэр, аһыллыаҕа. Ил Дархан Айсен Николаев олохтообут Илиҥҥи байыаннай уокуруктуун бииргэ үлэлээһининэн маннык үчүгэй сомоҕолоһууга тиэрдэр.Быыстапка биһиги сөптөөх суолунан иһэрбитигэр эрэли үөскэтэр.

Биһиги буойуннарбыт, волонтердарбыт уонна бүтүн өрөспүүбүлүкэбит нацизмы утары охсуһууга кылааттара улахан уонна дойду бүттүүнүгэр олус суолталаах», – диэн Дмитрий Соловьев бэлиэтээн эттэ.

Быыстапкаҕа байыаннай дьайыы фронуттан аҕалыллыбыт түөрт бронетранспортердар уонна биир ббойобуой массыына туруоруллуохтара. «Манна аан дойду араас муннугуттан кэриэтэ байыаннай тиэхиньикэ холобурдара бааллар. Биһиги 39-с гвардейскай мотострелковай биригээдэ байыаннайдара Соҕуруу-Донецкай хайысхаҕа былдьаабыт Америка М113 бронетранспортерын көрдөрөбүт. Ону таһынан Саха сирин олохтоохторо французскай, финскэй уонна украинскай бронетранспортердары көрүөхтэрэ. Биир интэриэһинэй эспэнээт – АХШ-га оҥоһуллубут М2 “Брэдли”  бойобуой массыыната. Массыынаны эмиэ Соҕуруу-Донецкай хайысхаҕа “Восток” сэриилэр бөлөхтөрүн 14-с гвардейскай анал анаммыт биригээдэтин байыаннайдара былдьаабыттара», – диэн “Восток” сэриилэр бөлөхтөрүн бэрэстэбиитэлэ кэпсээтэ.

Санатан эттэххэ, сэтинньи 4-6 күннэригэр Дьокуускайга «Норуот уонна аармыйа биир сомоҕо» III Өрөспүүбүлүкэтээҕи Фаизмы утары пуорум буолуоҕа. Манна байыаннай дьайыы кыттыылаахтара, бэтэрээннэр, ыччат уонна уопсастыбаннай тэрилтэлэр бэрэстэбиитэллэрэ түмүстүөхтэрэ.