Дьокуускайга сөтүөлүү сылдьар оҕоҕо ыт саба түстэ

Дьокуускайга бэйэтин олбуоругар бассейҥҥа сөтүөлүү сылдьар оҕоҕо ыт саба түспүтүн туһунан социальнай ситимҥэ тарҕанна. Быһылаан куорат даачалатыгар тахсыбыт.

Куйаас күн оҕо бассейңңа сөтүөлүү сырыттаҕына, ыаллыы олбуортан сыабыттан босхо барбыт ыт ойон киирэн оҕоҕо саба түспүт.  Оҕо ийэтэ чугас буолан илиитигэр туох түбэһэринэн охсуолаабыт. Эмсэҕэлээбит оҕоҕо мэдиссиинэ киинин быраастарын ыҥырбыттар. Оҕо эчэйиитин тикпиттэр, уоскутар укуол туруорбуттар. Эмсэҕэлээбит оҕо ийэтигэр мэдиссиинэ киинин быраастара иһитиннэрбиттэринэн, дьыала тута борокуратуураҕа ыытыллар. Ону сэргэ, оҕо ийэтэ полицияҕа үҥсэр туһунан иһитиннэрбит.

Сайын куорат ыала үксэ даачаҕа көһөр. Олбуордарын харабыллатаары үгүстэр ыттаналлар. Оттон күһүн быстах ылбыт ыттарын кыбартыыраҕа илдьибэккэ, бэйдиэ ыыталлар. Ыттаах хаһаайыттарга эппиэтинэс улаатыахтаах.