Дьокуускайга снайпердар турнирдара саҕаланна

Бүгүн, алтынньы 4 күнүгэр, Дьокуускайга «Сулус» полигон баазатыгар Сэбиэскэй Сойуус Дьоруойа Федор Матвеевич Охлопков аатынан ыраах дистанцияҕа ытыыга Арассыыйа Федерациятын Сэбилэниилээх күүстэрин чөмпүйэнээтин дьиссипилиинэтин “бойобуой снайпинг” аһаҕас турнира саҕаланна.

Күрэхтэһиини  төрүттээбит дьон Юрий Трутнев, Ил Дархан Айсен Николаев эҕэрдэ тылынан астылар.
Быйылгы үһүс турнирга хаһааҥҥытааҕар да элбэх киһи кэлбитин, кыттааччылар таһымнара үрдээбитин бэлиэтииллэр.
Саха сиринэээҕи снайпиҥҥа квалификацияны ааспытым диэн киэн тутта этиллэр буолбут.

Турниры бэрэсидьиэн боломуочуйалаах бэрэстэбиитэлин аппараата, Арассыыйатааҕы бойобуой снайпинг федерацията, «ВОИН» байыаннай-спортивнай бэлэмнээһин уонна патриотическай иитии киинэ, СӨ бырабыыталыстыбата тэрийэллэр. Манна снайпер пааралар (биир кыттааччыта ытар, биирэ кэтээн көрөр, көннөрөр) күрэхтэһэллэр. Кыттааччылар оруолларын атастаһыа, бинтиэпкэлэрин бэрсиэ суохтаахтар. Спортивнай разрядтан, дуоһунастан, сааһыттан, дьахтар-эр киһи буоларыттан тутулуга суох, бары тэҥ усулуобуйаҕа күрэхтэһэллэр.