Дьокуускайга социальнай салаа эдэр исписэлиистэрин бастакы сүлүөтэ саҕаланна

Дьокуускайга атырдьах ыйын 28-30 күннэригэр Саха сирин Үлэҕэ уонна социальнай сайдыыга министиэристибэтин эдэр исписэлиистэрин бастакы сүлүөтэ ыытыллар.

Манна өрөспүүбүлүкэ бары муннуктарыттан 76 эдэр социальнай эйгэ үлэһиттэрэ кыттыыны ылаллар. Бу туһунан Ил Дархан уонна бырабыыталыстыба пресс-сулууспата суруйар.

Сүлүөт «Виктория» лааҕыр баазатыгар ыытыллар. Тэрээһин сыала-соруга-эдэр исписэлиистэр идэҕэ түмсүүлэрин бөҕөргөтүү,  идэҕэ бигэ сыһыаны олохтооһун, ыччаты  салааларынан бырайыактары ырытан оҥорууга уонна олоххо киллэриигэ кыттыһыннарыы.

Бастакы күн кыттааччылар хамаандаларга арахсаллар уонна «Эдэр дьон көрүүтэ» диэн тиэмэҕэ корпоративнай бырайыактары оҥороллор. Ону тэҥэ тэрийээччилэр эдэр үлэһиттэригэр хамаанданан професиональнай өттүнэн үүнүү оонньууларын, социальнай эйгэ интэриэһинэй дьонун кытта көрсүһүүнү уонна доҕордоһуу киэһэтин ыытыахтара.

Иккис күн исписэлиистэр информационнай-үөрэх былаһааккаларыгар үлэлиэхтэрэ, маастар-кылаастарга кыттыахтара уонна Саха сирин Үлэҕэ уонна социальнай сайдыы миниистирэ Елена Волкованы кытта көрсүөхтэрэ.

«Мой выбор – социальная работа» видео-куонкурус түмүгэ биллиэҕэ. Маны сэргэ кэнсиэр былааннанар. Эдэр үлэһиттэр сүлүөтүн тиһэх күнүгэр  Үлэҕэ уонна социальнай сайдыыга министиэристибэтин алын сүһүөх тэрилтэлэрин үлэтин-хамнаһын кытта билиһиннэриэхтэрэ.