Дьокуускайга сокуоннай саастарын ситэ илик оҕолор эчэйбит чахчыларынан холуобунай дьыалалар көбүтүлүннүлэр

Ил Дархан Айсен Николаев сорудаҕынан эрэгийиэн толорор былааһын боломуочуйалаах уорганнара Дьокуускай куорат «Ивушка» оҕо уһуйааныгар уонна Өрөспүүбүлүкэтээҕи реабилитация уонна успуорт мэдиссиинэтин киинигэр тахсыбыт хас биирдии түбэлтэни бары өттүнэн бэрэбиэркэлиири тэрийдилэр.

Ылыллыбыт миэрэлэр чэрчитинэн эмсэҕэлээбит оҕолорго наадалаах көмө оҥоһуллар, оттон быһылааннар бары быһыыларын-майгыларын силиэстийэлээһин кэтээн көрөр уорганнар хонтуруолларынан салҕанар.

СӨ Борокуратуурата 75 №-дээх «Ивушка» оскуола иннинээҕи үөрэхтээһин тэрилтэтигэр уонна Өрөспүүбүлүкэтээҕи реабилитация уонна успуорт мэдиссиинэтин киинигэр тахсыбыт, сокуоннай саастарын ситэ илик оҕолор эчэйбит чахчыларынан бэрэбиэркэлэри ыытта.

Силиэстийэҕэ быһаарыллыбытынан, бэс ыйын 2 күнүгэр «Ивушка» оҕо уһуйааныгар сокуоннай сааһын ситэ илик оҕо этин-сиинин эчэппит — уҥуоҕун  тоһуппут. Оҕоҕо бастакы мэдиссиинискэй көмө оҥоһуллубатаҕынан сибээстээн, Дьокуускай куорат борокуратуурата тэрилтэ сэбиэдиссэйигэр туруорсуу киллэрдэ, оҕо интэриэһин көмүскээн үөрэх тэрилтэтиттэн моральнай уонна материальнай хоромньуну толуйтарар туһунан суукка ирдэбил сайабылыанньата ыытылынна.

Иккис түбэлтэ Өрөспүүбүлүкэтээҕи  реабилитация уонна успуорт мэдиссиинэтин киинигэр сокуоннай сааһын ситэ илик оҕо эчэйиитигэр сыһыаннаах. Сокуоннай сааһын ситэ илик оҕо биллибэт быһыыга-майгыга этин-сиинин эчэппит.

Быһылаан чахчыларын чуолкайдыыр уонна оҥоһуллубут мэдиссиинискэй көмө хаачыстыбатын сыаналыыр туһугар бэрэбиэркэҕэ Росздравнадзор Саха сиринээҕи территориальнай салаатын исписэлииһэ кытынна. Ону таһынан, буруйу оҥоруу туһунан иһитиннэриилэри бастакы көрүүгэ быраабы араҥаччылыыр уорганнар дьайыыларыгар кэһиилэр тахсыбыттара быһаарылыннылар. Ол курдук, матырыйааллары кэмигэр регистрациялаабат буолуу, силиэстийэҕэ сыһыаннааҕын быһаарарга уонна холуобунай дьыаланы көбүтэллэрин тохтотууга төрүөтэ суох быһаарыныылары ылыныы чахчылара таҕыстылар. Онон сибээстээн Дьокуускай куорат борокуратуурата силиэстийэлиир уорган салайааччытын аатыгар туруорсуулары киллэрдэ уонна сөптөөх ирдэбиллэри ыытта.

Борокуруор аахтарын көрүү түмүгүнэн сокуоннай саастарын ситэ илик оҕолор олохторугар уонна доруобуйаларыгар куттал суох буолуутун ирдэбилигэр эппиэттээбэт өҥөнү оҥоруу бэлиэлэринэн холуобунай дьыалалар көбүтүлүннүлэр, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.