Дьокуускайга «Спортивнай» микро-түөлбэ бастакы сыбаайата түстэ

Дьокуускайга «Спортивнай» микро-түөлбэ бастакы дьиэтин сыбаайата түстэ. Саҥа түөлбэҕэ 14 тыһыынчаттан тахса киһи олоруоҕа. Бу туһунан СИА суруйар.

Хаарбах дьиэттэн көһөрүү бырагырааматынан манна «2», «4» уонна «17» кыбартаал олохтоохторо көһүөхтэрэ. Былаан быһыытынан, 161 элбэх кыбартыыралаах дьиэ көтүрүллэн, ол миэстэтигэр 46 элбэх этээстээх дьиэ, икки уһуйаан, икки оскуола, элбэх функциялаах спортивнай комплекс тутуллуохтаах.

«Дьокуускайга хаарбах дьиэттэн көһөрүү бырагырааматын иккис түһүмэҕэ ситиһиилээхтик олоххо киирэр. 2017 сыл иннинэ хаарбаҕынан билиниллибит дьиэлээх дьону барыларын көһөрөбүт. Үһүс түһүмэҕи күүппэккэ, дьоҥҥо билигин көмөлөһөр сорук турар. 2032 сылга Дьокуускайга биир даҕаны хаарбах дьиэ суох буолуохтаах диэн сыаллаахпыт. Бу Ил Дархан Айсен Николаев ыйааҕар суруллубута», — диэн Дьокуускай баһылыга Евгений Григорьев эттэ.