Дьокуускайга Спортивнай түөлбэҕэ 240 миэстэлээх уһуйаан аһыллаары турар

Саҥа аһыллар уһуйаан туһунан СӨ бырабыыталыстыбатын бэрээссэдээтэлин бастакы солбуйааччы Дмитрий Садовников бэрэссэдээтэллээх социальнай суолталаах тутуулары тутар мунньахха кэпсэттилэр.

Эбийиэк 92% тутуллан бүппүт. Ис үлэтэ бүппүтүн кэриэтэ, бэдэрээтчит уотун-күөһүн тарда уонна кирилиэс килиэккэлэрин таҥа сылдьар. 50-ча исписэлиис үлэлиир. Уһуйаан сэтинньигэ, Норуот сомоҕолоһуутун күнүгэр аһыллара былааннанар.

Атын улуустарга, Дьокуускайга тутулла турар үөрэх эбийиэктэрин эмиэ көрдүлэр. Нам улууһугар 450 миэстэлээх оскуола тутуллар, 70% бэлэм буолбут, 19 киһи үлэлиир. Сунтаарга эмиэ итиччэ миэстэлээх оскуола-лиссиэй тутулла турар. Үлэ тэтимэ үрдүк. Дьокуускайга 253 миэстэлээх 1№-дээх оскуола тутуута салҕанар, бэлэмэ 70% буолбут, 80 киһи үлэлиир.

Доруобуйа харыстабылыгар үлэ эмиэ көхтөөхтүк барар. Кэбээйи улууһун Сангаар бөһүөлэгэр   биир симиэнэҕэ 104 киһи сылдьар поликлиникалаах, 45 куойкалаах балыыһа комплекса тутулла турар. Тас үлэтэ түмүктэнэн эрэр, тупсарыы үлэтэ ыытыллар, сылытар тэрил туруоруллан, түмүктүүр үлэтэ саҕаламмыт. Эбийиэк 65% бэлэм, 50 исписэлиис үлэлиир. Намҥа эмтиир куорпус тутулла турар: тас уонна тупсарар үлэлэр ыытыллаллар, ону кытта инженернэй коммуникациялар тардыллаллар. Мэдисииинэ тэрилэ, тээбиринэ алтынньыга-сэтинньигэ кэлиэхтээх. Аллараа Бэстээх бөһүөлэгэр учаастактааҕы балыыһа тутуута бара турар; эбийиэк 61% тутуллан бүппүт. Учаастакка 30-ча исписэлиис үлэлии-хамсыы сылдьар, дьиэ үрдүн уонна ититэр систиэмэлэри туруораллар.

Нерюнгри кииннэммит оройуоннааҕы балыыһатын саҥардан оҥоро сылдьаллар. Тирии-венерологическай диспансер дьиэтин хаттаан оҥоруу үлэтэ түмүктэнэн эрэр, бэлэмэ 94%. Улахан дьон поликлиникатын хапытаалынай өрөмүөнэ 61% түмүктэммит, ахсынньыга аһыллыахтаах. Эмтиир куорпустар эмиэ бүтэллэрэ чугаһаабыт: В блок — 81%, А блок — 83%. Бу Нерюнгритааҕы КОБ доруобуйаҕа харыстабылын эбийиэктэрин хапытаалынай  өрөмүөннэрэ, саҥардан оҥоһуулара 2026 сыл бүтүөр диэри түмүктэниэхтээхтэр, диэн иһитиннэрэр Ил Дархан, бырабыыталыстыба пресс-сулууспата.