Дьокуускайга Стадухин уулуссаҕа күлүгээннээбит дьону туттулар

Бэҕэһээ, атырдьах ыйын  24 күнүгэр, сарсыарда эрдэ   Стадухин уулуссаҕа түүнү быһа үлэлиир кафе таһыгар эр дьон  айдаарсан, охсуһан, административнай эппиэтинэскэ тардылыннылар.

Ол курдук хас даҕаны эр киһи охсуһа сылдьар видеолара бэҕэһээ социальнай ситимҥэ тарҕанна. Стадухин уулуссатыгар баар түүнү быһа үлэлиир кафе таһыгар наар арыгыһыттар мусталларын, өссө  охсуһалларын туһунан туһааннаах оройуон олохтоохторо  кэпсэтэллэрэ  үгүстүк иһиллэр буолла.

Бэҕэһээ охсуһууну «Безопасный город» ситим нөҥүө көрөөт, Дьокуускайдааҕы полиция патруллуур-постовой сулууспатын үлэһиттэрэ тиийэн, уопсастыбаннай бэрээдэги кэспит  19 — 35  саастаах түөрт эр киһини туттулар.

Эр дьон полиция отделыгар аҕалыллан, административнай эппиэтинэскэ тардылыннылар. Бэрэбиэркэ салгыы ыытыллар диэн @mumvdyakutskoe иһитиннэрдэ.