Дьокуускайга суол саахалларыгар үс киһи эчэйдэ

Ааспыт суукка иһигэр Дьокуускайга 11 суол саахала буолбута бэлиэтэммит, онно үс киһи араас эчэйиилэри ылбытын туһунан Госавтоинспекция иһитиннэрэр.

Бэнидьиэнньиккэ 9 чаас саҕана «Тойота Хайс» микро-оптуобус 46 саастаах суоппара Чернышевскай уулуссатынан айаннаан иһэн хаҥас салайаары, утары иһэр «Тойота Королла» массыынаҕа суолу биэрбэтэх. Суһал көмө биригээдэтэ «Тойота Королла» суоппарын уонна пассажирын балыыһаҕа киллэрбит.

12 чаас саҕана Михаил Николаев проспегар «Тойота Филдер» массыына 41 саастаах суоппара «Тойота Пробокс» массыынаҕа кэлэн түспүт.

Ол түмүгэр «Тойота Пробокс» массыына пассажира төбөтүн, этин-сиинин эчэппит.