Дьокуускайга суол саахалыгар икки оҕо эчэйбит

Дьокуускайга ыам ыйын 21 күнүгэр 9 суол быһылаана регистрацияламмыт, олортон иккитигэр сокуоннай саастарын ситэ илик оҕолор эмсэҕэлээбиттэр. Ол туһунан киин куорат Госавтоинспекцията иһитиннэрэр.

Түүн ГИБДД дьуһуурунай чааһыгар саахал түмүгэр сааһын ситэ илик оҕо эчэйбитин туһунан балыыһаттан биллэрии киирбит. Бэрэбиэркэ кэмигэр 14 саастаах кыыс Дзержинскай уулусса 1 №- дээх дьиэтин таһыгар күнүс 14:30 саҕана суол саахалыгар эчэйиини ылбыт. Суол быраабылатын кэһэн, суоппар суол саахалын миэстэтиттэн куоппут.

Ол күн киэһэ 17.00 чаас саҕана Лермонтов аатынан уулуссатын 115 №- дээх дьиэтин таһыгар 57 саастаах суоппар «Тойота Виш» массыынанан 13 саастаах оҕону түҥнэри көппүт. Ол түмүгэр сокуоннай сааһын ситэ илик оҕо эчэйбит, балыыһаламмыт.

Сыл саҕаланыаҕыттан Дьокуускайга сокуоннай саастарын ситэ илик оҕолор кыттыылаах 51 суол быһылаана регистрацияламмыт. Түмүгэр 38 оҕо араас эчэйиини ылбытын бэлиэтииллэр.