Дьокуускайга суоппар ДПС массыынатын тарааннаабыт

Дьокуускайга ДПС инспектордарыгар утарыласпыта олохтоох киһиэхэ холуобунай дьыала тэрилиннэ.

Бу туһунан ИДьМ сулууспатын Госавтоинспекцията иһитиннэрэр.

Бэс ыйын 16 күнүгэр сарсыарда Шавкунов уул. 70 №- дээх дьиэтин таһыгар «Тойота Ист» массыына 26 саастаах суоппара административнай саахал туһунан боротокуолга сөпсөспөккө соруйан ДПС инспектордарын массыынатын тарааннаабыт.

Саахал түмүгэр ДПС икки инспектора эчэйиини ылбыттар. Суоппар тутуллан силиэстийэлиир уоргаҥҥа тиэрдиллибит. Былаас бэрэстэбиитэлигэр утарыласпытын иһин холуобунай дьыала тэрилиннэ.