Дьокуускайга суукка иһигэр сураҕа суох сүппүт алта киһини буллулар

Дьокуускайга ааспыт суукка устата сураҕа суох сүппүт алта киһи булулунна. Бу туһунан ИДьМ пресс-сулууспата иһитиннэрэр. 

• 38 саастаах эр киһи 15-чэ хонук тухары биллибэтэх. Кинини эдьиийэ көрдөөбүт. Кэлин быһаарыллыбыта, эр киһи арыгылаабыт, күүлэйдии сылдьыбыт уонна ханна баарын эппэтэх.
• 40 саастаах олохтоох дьахтары кэргэнэ көрдөөбүт. Иирсээн кэнниттэн дьиэ кэргэн холбоспут.
• 20 саастаах уол төрөппүттэриттэн арахсан, туспа олорорго быһаарыммытын олус уратытык көрдөрбүт – ый кэриҥэ ийэтигэр биллибэккэ сылдьыбыт.
• Дьокуускай олохтооҕо полицияны кытта 10 хонук устата доҕорун көрдөөбүт. Көрдөөһүҥҥэ сылдьар 42 саастаах киһи ГРЭС оройуонугар көстүбүт, токсикологическай тутулуктан эмтэниэн наада.
• Нэдиэлэ устата көрдөөһүн дьаһалларынан 43 саастаах дьахтар балыыһаҕа баарын булбуттар. Кини онно атын араспаанньанан суруттаран киирбит эбит, ол эрээри полиция быһаарсыбыт. Билигин инсуллаабыт дьахтары аймахтара көрөр-истэр кыахтаннылар. Ыарыы биир төрүөтүнэн арыгыны аһары испитэ быһаарыллыбыт.
• Педагогтар уопсай дьиэҕэ олорор устудьуону көрдөөбүттэр. Эдэр киһи 18 сааһын туолуохтаах эбит, ол иһин эрдэ туспа олоҕу саҕалыырга быһаарыммыт. Оттон педагогтар кини дьылҕатын туһунан долгуйууларын сөбүлээбэккэ утары ылыммыт.