Дьокуускайга сыбаалка умайда

Бүгүн Дьокуускай куоракка Бүлүүлүүр суолга баар сыбаалка умайбытын туһунан иһитиннэрии тарҕанна.

Онуоха СӨ Экологияҕа, ойуур хаһаайыстыбатыгар уонна айылҕаны туһаныыга министиэристибэтэ маннык хоруйдаата:

— Бүгүн, ахсынньы 17 күнүгэр, Бүлүүлүүр суол 7 км баар полигонтан буруо тахсарын туһунан иһитиннэрии киирбитэ.   РФ Бырабыыталыстыбатын 2021 сыл бэс ыйын 30 күнүнээҕи   «О федеральном государственном экологическом контроле (надзоре)» (№ 1096)  уурааҕыгар олоҕуран, кытаанах хомунаалынай тобохтор полигоннара  федеральнай  экологическай надзор эбийиэгэ буолар. Онон,  Росприроднадзор СӨ управлениетыгар  уонна Роспотребнадзор СӨ управлениетыгар сыбаалкаҕа тахсыбыт буруо туһунан иһитиннэрдибит уонна  туһааннаах боломуочуйаларыгар олоҕуран миэрэ ылалларыгар эттибит. 

«Жилкомсервис» МУП иһитинэрбитинэн, билигин куораттааҕы полигоҥҥа уоту бохсууга үлэлииллэр. Манна сарсыарда бөх-сах умайбыт. Тыал түһэн умайыы учаастага улааппыт.