Дьокуускайга сыл бүтүөр диэри куорат суолларын 80 %-нын нуормаҕа тиэрдиэхтэрэ

«Куттала суох уонна хаачыстыбалаах суоллар» национальнай бырайыак чэрчитинэн тутуу сезона түмүктэниэр диэри Дьокуускайга 36,5 км усталаах суол ситимин үлэҕэ киллэрэр былааннаахтар.

Урукку сылларга ыытыллыбыт үлэлэри учуоттаан, куорат суолларын 80%-нын нуормаҕа тиэрдии ситиһиллиэ.

Дьокуускай куорат дьаһалтатын дааннайынан, билигин өрөмүөн үлэтэ 21 эбийиэккэ ытыллар. Кузьмин, Можайскай, Мелиоратордар, Автомобилистар, Речников, Рихарда Зорге, Ольховай, Иван Крафт, Бестужев-Марлинскай, Макаренко, Генерал Притузов уонна Рыдзинскай уулуссаларыгар бараллар. Үгүс эбийиэктэринэн үлэ түмүктэнэрэ күүтүллэр.

Ону таһынан быйыл Птицефабрика түөлбэтигэр киирэр суоллары оҥорууга, ону таһынан Хотугу кыбаарталга уонна Сайдыы суолунан Тускул түөлбэнэн суоллары өрөмүөннүүр үлэлэр түмүктэниэхтэрэ. Куорат таһынааҕы нэһилиэнньэлээх пууннарга Заречная, Новая, Тепличный переулок уонна Пригородный бөһүөлэк оскуолатыгар киирэр суоллары хапытаалынай өрөмүөннэрэ  ыытыллаллар.

Санатан эттэххэ, Арассыйа Бэрэсидьиэнэ Владимир Путин көҕүлээбит национальнай бырайыагын чэрчитинэн 2023 сылга киин куоракка 30-ча км кэриҥэ усталаах суол өрөмүөннэммит уонна саҥалыы тутуллубут. 5 сыл иһигэр национальнай бырайыагынан 133 эбийиэккэ 164 км кэриҥэ усталаах нуормаҕа тиэрдиллибит.