Дьокуускайга табыгастаах куортам дьиэтигэр сайаапкалары алтынньы 17 күнүттэн ылан барыахтара

«Уһук Илиҥҥи федеральнай уокурукка табыгастаах куортам дьиэтэ» бырагыраама чэрчитинэн, өрөспүүбүлүкэҕэ чэпчэтиилээх усулуобуйанан дьиэни куортамҥа ылыан баҕалаах дьонтон сайаапкалары ылыы туһунан Тутуу министиэристибэтин тг-ханаала иһитиннэрэр.

Куортамҥа бэриллэр дьиэ аадырыһа Дьокуускайга 111 кыбартаалга  «БИЛИБИНО» комплекска Билибин уул. 17 дьиэтэ буолар. Кыбартыыралар наадалаах миэбэлинэн, сантехниканан уонна дьиэҕэ туттуллар тиэхиньикэнэн хааччыллыбыттар уонна чэпчэтиилээх сыананан субаренда дуогабарынан бэриллэллэр.

Кыбартыыра кээмэйиттэн көрөн сыаната 5000-тан 14000 солкуобайга диэри (быһа холуйан, биир квадратнай миэтэрэҕэ 240 солкуобай кэриҥэ) буолуоҕа. Эбии хомунаалынай төлөбүрүн төлүүллэр.

Докумуоннары эрэгийиэннээҕи эпэрээтэр, «СӨ Олорор дьиэ бырагыраамаларын сайыннарыы киинэ» автономнай коммерческайа суох тэрилтэ, 2025 сыл алтынньы 17 -24 күннэригэр «Саха Өрөспүүбүлүкэтин судаарыстыбаннай уонна муниципальнай өҥөлөрүн портала» судаарыстыбаннай информационнай систиэмэ https://e-yakutia.ru/#/shortCard/14202430 нөҥүө 7 үлэ күнүн устата ылыаҕа. Ону кытта маннык аадырыска: Дьокуускай, Орджоникидзе уул. 38 дьиэтэ, 2 этээс, 203 каб. (9.30 – 17:00 ч.), төл: (4112) 507-678, 508-942, 508-940, 508-943.

Субаренда дуогабарын түһэрсэргэ ханнык гражданнар хапсыахтарын сөбүн туһунан информация уонна наадалаах докумуоннар испииһэктэрэ Тутуу министиэристибэтин официальнай сигэтигэр бааллар:    https://minstroy.sakha.gov.ru/news/13357