Дьокуускайга таһаҕас тиэйэр массыыналаах икки этээстээх гараас умайда

Тохсунньу 26 күнүгэр сарсыарда 11:38 чааска Дьокуускайдааҕы баһаарынай-быыһыыр сулууспатыгар икки этээстээх тутуу уонна «Чолбон» СОНТ 4 кыбартаалыгар таһаҕас тиэйэр массыына умайбытын  туһунан тыллаабыттар.

Бу туһунан Саха сиринээҕи ЫБММ пресс-сулууспата иһитиннэрэр. Баһаар түмүгэр  икки этээстээх гараас уонна массыына, уопсайа 360 квадратнай миэтэрэ иэнэ, уокка былдьаммыт. Барыллаан быһаарыынан, сыбаарка үлэтин кэмигэр баһаартан кутталлаах буолуу быраабылатын тутуспатахтар. Билигин буруйдаахтар  уонна хоромньу суумата быһаарыллар.