Дьокуускайга терроризмы өйөөбүт култуура тэрилтэтин үлэһитэ тутулунна

Дьокуускайга терроризмы өйөөһүн иһин култуура тэрилтэтин 35 саастаах үлэһитэ тутулунна.

Бу туһунан ФСБ Саха сиринээҕи управлениетын пресс-сулууспата иһитиннэрэр. Буруйдаах Украина байыаннай тэриллиитин YouTube ханаалыгар Арассыыйа Федерациятыгар террористическай тэрилтэнэн билиниллибит үлэтин-хамнаһын өйүүр иһитиннэриини таһаарбыт.

«Эр киһи соруйан видеохостиҥҥа аккаунт арыйбыт. Украина террористическай тэриллиилэрэ таһаарар матырыйаалларын көрбүт, кинилэр үлэлэрин-хамнастарын сөптөөҕүнэн, өйөбүлгэ уонна үтүктүүгэ наадалааҕынан билиммит», — диэн иһитиннэриигэ этиллэр.

ФСБ Саха сиринээҕи управлениетын силиэстийэлиир подразделениета култуура тэрилтэтин үлэһитин утары «Интэриниэт ситимин туһанан терроризмы аһаҕастык өйөөһүн» диэн ыстатыйанан холуобунай дьыаланы көбүттэ.