Дьокуускайга — «Тоҕус оһуордаах түһүлгэ»!

Сергей Афанасьевич Зверев-Кыыл Уолун сүдү талааныгар сүгүрүйэн, 125 үбүлүөйдээх сылын көрсө «ТОҔУС ОҺУОРДААХ ТҮҺҮЛГЭ» диэн өрөспүүбүлүкэтээҕи норуот уус-уран айымньытын күрэһэ Дьокуускай куоракка муус устар 9-10 күннэригэр үһүс төгүлүн ыытылла тураллар.

Күрэс үөрүүлээх арыллыыта П.А. Ойуунускай аатынан Саха академическай тыйаатырыгар муус устар 9 күнүгэр сарсыарда 10 чаастан буолла. Оһуокай, олоҥхо уутуйан үөскээбит Сунтаар сириттэн суолу баттаһа анаан айаннаан кэлэн, Туймаада туонатыгар өбүгэ оонньууларын көҕүлүттэн туттулар, дьоҥҥо-сэргэҕэ маанылаан утары ууннулар. Манна үгүс дьон кэлэн, сааланы толору тоҕуоруста, алгыһы иҥэринэн, тойугу истэн, оһуокайга үҥкүүлээн, сөрүүн сүөгэй курдук саха тылын ылынан, тыыннара уһаан, дуоһуйдулар-астыннылар, букатын ыһыахха сылдьыбыт курдук сананнылар.

Улуус баһылыга Анатолий Григорьев Сергей Зверев үбүлүөйүгэр анаммыт Олоҥхо дойдутун ыһыаҕа диэн өрөспүүбүлүкэтээҕи суолталаах улахан ыһыах эһиил  Сунтаарга ыытылларын туһунан Ил Дархан ыйааҕа тахсыбытын  иһитиннэрдэ. Оттон бу «Тоҕус оһуордаах түһүлгэ» өрөспүүбүлүкэтээҕи күрэс спонсора, «Арктик-Капитал» хампаанньа салайааччыта Матвей Евсеев эһиилги тэрээһин үбүлээһинэ икки төгүл эбиллэрин туһунан эттэ.

Бүгүн  тэрээһиннэр “Арчы дьиэтэ” духуобунай култуура киинигэр, А.Е.Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр, Саха тыйаатырын Аччыгый саалатыгар ыытылла тураллар.

Күрэс 9 көрүҥүнэн ыытыллар: “Тойон ымыйа тула мустан” тойук күрэһэ; “Оллоонноон олорон олоҥхолуох” олоҥхо күрэһэ; “Оһуокай – саха алгыстаах үҥкүүтэ” оһуокай күрэһэ; “Саха ыллыыр ырыата” норуот ырыатын күрэһэ; “Тыл сүмэтэ” үгэ, чабырҕах, уус-уран ааҕыы күрэһэ; “Төрүт дорҕоон” саха музыкальнай үнүстүрүмүөннэригэр оонньооһун күрэһэ; “Саха үҥкүүтүн сарсыҥҥыта” бөлөҕүнэн төрүт үҥкүү күрэһэ; “Дьөһөгөй оҕотун маанылаах симэҕэ” ат симэҕин оҥорооччулар көрүү-күрэстэрэ; “Дэгиттэр быһах” саха быһаҕын көрүү-күрэс. 

Арчы дьиэтигэр оһуокай күрэһин бастакы күнэ үрдүк таһымнаахтык ааста. Араас улуустартан бастыҥ этээччилэр ох курдук оҥостон кэлэн, дуоһуйа оһуокайдаатылар. Бэҕэһээ улахан дьоҥҥо 35, оҕолорго 19 этээччи кыттыбыттар. Бүгүн оһуокай күрэҕэ салҕанар.

«Тыл сүмэтэ» күрэскэ (үгэ, чабырҕах, уус-уран ааҕыы) дьүүллүүр сүбэ бүгүн 28 кыттааччыттан 36 нүөмэри истиэҕэ. Араас улуустартан бөлөҕүнэн кытта кэлбиттэрэ үөрдэр.

Муус устар 10 күнүгэр киэһэ 5 чаастан Өксөкүлээх аатынан Норуоттар доҕордоһууларын дьиэтигэр Сунтаар оһуокайа дьиэрэйиэ. Маны тэҥэ, виртуальнай эйгэ саҥа сыһыарыытын сүрэхтиэхтэрэ. Виртуальнай ачыкыны кэттэххинэ, Кыыл Уола этэн-тыынан эҕилдьитэн, оһуокайдыы сылдьар түһүлгэтигэр илэ киирэн сылдьар курдук сананыаҕыҥ. 

Киэһэ 6 чаастан кэнсиэр, кыайыылаахтары наҕараадалааһын, дьоро киэһэ буолуоҕа. Ким Кылаан кыайыылаах буолара онно биллиэҕэ!

ЫСПЫРААПКА:

Сунтаар улууһугар 2018 сылтан муус устар 9 күнүгэр улуу ырыаһыт, оһуохайдьыт, үҥкүүһүт Сергей Зверев-Кыыл Уолун күнэ бэлиэтэнэр. Бу кини төрөөбүт бэлиэ күнэ буолбатах, аар тайҕа ырыаһыта бастакы улахан хайҕалын – САССР Үрдүкү Сэбиэтин Бочуотунай грамотатын ылбыт күнэ. Бу күн Сунтаарга  “Тоҕус оһуордаах түһүлгэ” диэн норуот айымньытын 9 көрүҥэр күрэс ыытыллар буолбута. Кыыл Уола 9 көрүҥҥэ дэгиттэр дьоҕурдаах киһи этэ. Онтон бу сырыыга улуу киһи үбүлүөйүн көрсө, өрөспүүбүлүкэ килбэйэр киинигэр, долгуйар Дьокуускай куоракка ыытыллар.

КЫЛААН КЫАЙЫЫЛААХТАРГА: улахан дьоҥҥо — 300 000 (үс сүүс тыһыынча) солкуобай; оҕолорго – 100 000 (сүүс тыһыынча) солкуобай;  оһуокай Дархан этээччитигэр – 100 000 (сүүс тыһыынча) солкуобай;  хас биирдии көрүҥҥэ I, II, III үрдэллэр, анал ааттар олохтонуохтара;  хас биирдии кыттааччыга туоһу суруктар туттарыллыахтара.