Дьокуускайга Туймаада ыһыаҕа үөрүүлээхтик арылынна

Бүгүн, бэс ыйын 28 күнүгэр, Үс Хатыҥҥа Туймаада ыһыаҕын үөрүүлээх арыллыыта буолла.

Быйылгы саамай киэҥ далааһыннаах национальнай бырааһынньык Аҕа дойду Улуу сэриитигэр Кыайыы 80 сылыгар, Арассыыйаҕа Аҕа дойдуну көмүскээччи уонна Саха сиригэр Ийэ дойдуну көмүскээччи сылыгар ананна. Итини сэргэ, ыһыах өрөспүүбүлүкэҕэ икки улахан суолталаах түгэҥҥэ – уһулуччулаах бэлитиичэскэй уонна судаарыстыбаннай диэйэтэл Гавриил Иосифович Чиряев төрөөбүтэ 100 сылыгар уонна үҥкүү култууратын төрүттээччи, норуот ырыаһыта Сергей Афанасьевич Зверев-Кыыл Уола төрөөбүтэ 125 сылыгар ананна.

«Бүгүҥҥү бэлиэ күммүтүнэн, алгыстаах ыһыахпыт ытык Туймаада хочотугар үктэммиппитинэн, барыгытын ис сүрэхпиттэн эҕэрдэлиибин. Бу улуу ыһыаҕы биһиги Улуу Кыайыы 80 сылыгар аныыбыт. Биһиги бу кыайыыныуһансар биир дойлуаахтарбытыгар сүгүрүйэбит.

Кинилэр сырдык кэриэстэрин ытык тутабыт,  хайаан да кинилэргэ сөптөөх сыдьаанынан буолуохпут. Уонна, биллэн турар, биһиги бүгүн бүтүн дууһабытынан ийэ дойдубутун саҥа фашистартан көмүскүү сылдьар буойуннарбыт кытта бииргэбит.

Бүгүҥҥү алгыстаах алгыс тыллара кинилэргэ тиийдин, күүс-уох эптин, уонна оҕолорбут сотору кыайыылаах, тыыннаах, чэгиэн-чэбдик дьиэлэригэр төннөн кэллиннэр», – диэн  Айсен Николаев эҕэрдэ тылыгар эттэ.

Алгысчыттар Иван Васильев, Михаил Винокуров, Спиридон Григорьев Ытык уокка, сир иччилэригэр – Үөһээ Айыыларга сүгүрүйүү сиэрин-туомун толордулар.

Бырааһынньыкка РФ Тас сибээскэ министиэристибэтин Уһук Илиҥҥи субъектарга бэрэстэбиитэллэрэ, Крым Өрөспүүбүлүкэтин Ил Сэбиэтин уонна Татарстан Өрөспүүбүлүкэтин Ил Сэбиэтин, Казахстан Өрөспүүбүлүкэтин Астана куоратын Акиматын дэлэгээссийэлэрэ кыттыыны ылаллар., диэн иһитиннэрэр Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.