Дьокуускайга тупсарыллыбыт пляж аһылынна

Бэс ыйын 17 күнүттэн Дьокуускай куоракка сөтүөлүүр сир аһылынна. Былырыыҥҥытааҕар икки нэдиэлэ эрдэлээтилэр. 

Быйыл пляһы биллэ тупсарбыттар, тутуу бара турар. Баннердары туруорбуттар, ууга сэрэтэр, хааччахтыыр бууйкалары оҥорбуттар. Пляж сарсыарда 9 чаастан киэһэ 9 чааска диэри үлэлиир, күнүстэри-түүннэри ЧОП үлэһиттэрэ харабыллыахтара, анал быыһааччылар баар буолуохтара. Күн аайы бөҕү хомуйуохтара. Бөх тоҕор иһиттэр, таҥнар кабинкалар, туалеттар, атах суунар кырааннар баар буолбуттара үөрдэр.

Дьокуускай куорат тэхиньиичэскэй сулууспатын дириэктэрэ Виктор Обутов эппитинэн, уу уонна кумах эспэртиисэни ааһан, ылыллыбыт боруобалара ирдэбиллэргэ эппиэттииллэр.

Билигин пляһы тупсарыы үлэтэ салҕанар. Тротуары, күүлэйдиир, сынньанар сирдэри тупсаран оҥороллор. Манна өссө душ, аһыыр сир, сөтүөлүүр тэриллэри атыылыыр, уларсар сир, ийэ-оҕо хоһо, амфитеатр, оҕо оонньуур уонна спортивнай былаһааккалар оҥоһуллуохтаахтар. Медпуун баар буолуохтаах.

Уу төһө да тымныы буоллар, бастакы сөтүөлээччилэр номнуо кэлэн, сөтүөлээн эрэллэр.