Быыһыыр сулууспа пресс-сулууспата
Субуотаҕа киин куоракка Даркылаахха массыына ууга түспүт алдьархайа дьон-сэргэни аймаата. Кыыс оҕо уонна эр киһи өлбүттэр. Өскөтүн 45 кыраадыс тымныыга эдэр уол чугастааҕы дьиэлэргэ диэри сүүрэн тиийэн быыһааччылары ыҥырбатаҕа буоллар, сүтүк өссө элбэх буолуо этэ.
YakutiaDaily иһитиннэрэринэн, быыһааччы Саха сирин көҥүл тустууга сүүмэрдэммит хамаандатын чилиэнэ Егор Явловскай эбит. Быһылаан тахсарыгар кини массыынаҕа кэннигэр, үһүс эрээккэ утуйа сыппыт. Массыына ууга баран эрэрин көрөн, Егор түннүгү алдьаппыт уонна кытылга харбаан тахсыбыт. Кини көмөтө суох бары өлүөхтэрин өйдөөн, инчэҕэй таҥастаах биир биэрэстэттэн ордук сири сүүрбүт. Бастакы дьиэҕэ кинини киллэрбэтэхтэр, ол иһин салгыы сүүрбүт уонна муус буолан тоҥмут таҥастаах иккис дьиэҕэ тиийэн, Быыһыыр сулууспаҕа эрийбит.
Чурапчы успуорт оскуолатын иитиллээччитэ саамай ыарахан түгэҥҥэ дьону быыһыыр туһугар бэйэтин хорсунун, күүһүн уонна тулуурун көрдөрдө. Эрчиллиитэ суох киһи инчэҕэй таҥастаах тымныыга маннык ыраах сири сүүрэрэ саарбах. Успуорт уонна кытаанах санаа дьону быыһыырга көмөлөстө. Билигин Егор Явловскай балыыһаҕа сытар, туруга орто.
Быйыл кини Дмитрий Коркин аатынан норуоттар икки ардыларынааҕы турнирга боруонса призерунан буолбута уонна соторутааҕыта Красноярскайга Дмитрий Миндиашвили аатынан Бүтүн Арассыыйатааҕы турнирга 57 киилэҕэ диэри ыйааһыҥҥа үрүҥ көмүс мэтээли ылбыта.
Массыына муус анныгар барбытыттан сылтаан дьон өлбүтүгэр Саха сиринээҕи Силиэстийэлиир кэмитиэт «куттал суох буолуутун ирдэбиллэригэр эппиэттээбэт өҥөнү оҥоруу, сэрэҕэ суохтан икки киһи өлүүтүгэр тириэрдии» ыстатыйанан холуобунай дьыаланы тэрийдэ. «Toyota Estima» массыына кирдээх уу түһэр сиригэр муус анныгар барбыт.
Салоҥҥа сэттэ киһи баар эбит. Алта киһи бэйэлэрэ тахсыбыттар, ол эрэн кыыс оҕо массыына иһигэр хаалан тыына быстыбыт. Маны таһынан, биир эр киһи кытылга тахсан баран тыына быстыбыт. Массыына Чурапчыга айаннаан испит, суоппар улуустар икки ардыларыгар дьону таһыыга чааһынай өҥөнү оҥорор эбит.
Арассыыйаҕа үүнэр сыл олунньу 1 күнүттэн биир дьиэ кэргэҥҥэ биир эрэ чэпчэтиилээх кирэдьиити биэрэр хааччах…
Ахсынньы 19 күнүгэр прокакка тахсыбыт «Тооку уонна Чысхаан» толору метражтаах ойуулук киинэ дьон сэҥээриитин ылла…
Марфа, Сергей Расторгуевтар ааттарынан Саха циркэтэ үгэс буолбут Саҥа дьыллааҕы «Книга чудес» саҥа испэктээкилин сүрэхтээтэ.…
Дьокуускайга тохсунньу 4–6 күннэригэр өрөспүүбүлүкэ чөмпүйүөнэ Евгений Охотин кэриэһигэр саахымакка өрөспүүбүлүкэтээҕи турниры ыытар былааннанар. Бу…
Билиигэ-сайдыыга угуйбут, кэскиллээҕи, үйэлээҕи түстээбит, дьоҥҥо-сэргэҕэ кэрэни сахпыт Мария Кирилловна Потапова быйыл төрөөбүтэ 100 сыла…
Үүнэр сылтан НДС уонна дьиэ-уот тарыыптара үрдүүллэр, МРОТ, биэнсийэ уонна тиийинэн олоруу алын кээмэйэ улаатар.…