31 саастаах киһи таксыыс пааспарын уорбут

Арассыыйа ИДьМ «Дьокуускайдааҕы» 2-с №-дээх полиция отделын дьуһуурунай чааһыгар куорат таксыытыгар суоппарынан үлэлиир киһиттэн сайабылыанньа киирбит. Эмсэҕэлээбит киһи полиция үлэһиттэригэр массыынатын бардачогуттан пааспарын уорбуттарын эппит.

Бэрэбиэркэ түмүгэр, учаастактааҕы полиция боломуочунайа уорбаланааччы кимин быһаарда диэн ИДьМ пресс-сулууспата иһитиннэрэр. Уорбаланааччы таксыы пассажира – урут сууттаммыт 31 саастаах эр киһи буолбут.

Уорбаланааччы таксыынан айаннаан иһэн бардачокка пааспар сытарын бэлиэтии көрбүт. Докумуон иһигэр харчы баар буолуон сөп дии санаан, суоппар көрбөтүгэр пааспары уорбут. Ол эрээри пааспар иһигэр харчы суох буолан биэрбит.

Уоруллубут пааспар хаһаайыныгар төннөрүллүбүт. Арассыыйа Федерациятын Холуобунай кодексын 325 ыстатыйатын 2 чааһынан (Докумуоннары, ыстаампалары, бэчээттэри уоруу эбэтэр алдьатыы, эбэтэр акцизнай мааркалары, анал мааркалары эбэтэр онуоха сөп түбэһэр бэлиэлэри уоруу) холуобунай дьыала тэрилиннэ.