Дьокуускайга учууталларга байыаннай үөрэххэ идэни үрдэтии кууруһа ыытылынна

Ахсынньы 2-6 күннэригэр Дьокуускайдааҕы кадетскай оскуола-интэринээт баазатыгар ийэ дойдуну көмүскээһин уонна куттала суох буолуу быраагырааманан учууталларга идэни үрдэтии кууруһа ыытылынна.

Бу тэрээһиннэргэ Саха сирин араас муннуктарыттан 107 учуутал кыттыыны ылла. Быраактыка куурустара бу дьыл атырдьах ыйын бүтүүтүттэн ыытыллаллар. Куурус кыттааччылара Дьокуускай куорат, Өлүөхүмэ,Чурапчы, Булуҥ, Ленскай, Кэбээйи, Уус Маайа, Усуйаана, Абый, Муома, Нам, Аллараа Халыма, Өймөкөөн, Мииринэй, Ньурба, Мэҥэ Хаҥалас, Амма, Томпо, Уус Алдан, Орто Халыма, Хаҥалас, Нерюнгри, Аллайыаха, Горнай уонна Таатта улуустарыттан муһуннулар.

Үөрэх салайааччытынан С.Н.Донской аатынан Үөрэх сайдыытын уонна идэни үрдэтии үнүстүүт старшай преподавателэ, ийэ дойдуну көмүскээһин уонна куттала суох буолуу биридимиэт учуутала Ирина Тарасенко буолла. Дьарыктар  «Авангард» үөрэх киинин инструктордарынан Роман Попов салайааччылаах 6 хайысханан ыытылыннылар: основы тактической подготовки, основы огневой подготовки, основы тактической медицины, основы инженерной подготовки, основы управления БПЛА, основы связи.

Үөрэх кэмигэр кууруска анал байыаннай дьайыы кыттыылааҕа, Арассыйа Дьоруойа, СӨ Ыччат бэлиитикэтигэр уонна социальнай коммуникацияларга миниистирин эбээһинэһин толорооччу Игорь Юргин кытынна. Кини маннык тэрээһин куттала суох буолуу быраабылатын үөрэтэргэ, ону сэргэ учуутал сүрүн оруолу толорон саҥа үөрэх бырагырааматын олоххо киллэриигэ сүҥкэн эппиэтинэстээҕин бэлиэтээтэ.

   Степан Кривошапкин