Дьокуускайга Улуу Кыайыы 80 сылыгар 80 сирень талаҕы олортулар

Дьокуускайга Улуу Кыайыы 80 сылыгар анаммыт «Кыайыы сиренэ» аахсыйа ыытылынна. Сайсары күөл тупсарыллыбыт набережнайыгар 80 сирень талаҕы олортулар. Бу туһунан киин куорат мэриятын пресс-сулууспата иһитиннэрэр.

Аахсыйаҕа Дьокуускай куорат баһылыгын солбуйааччыта Владислав Слепцов, баһылык сүбэһитэ Екатерина Павлова, куорат Бэтэрээннэрин сэбиэтин бэрэссэдээтэлэ Николай Тряпша, Автодорожнай уокурук управатын салайааччыта Василий Поскачин, Управа уонна куорат дьаһалтатын үлэһиттэрэ кыттыыны ыллылар.

«Биһиги Кыайыы 80 сылынан 80 сирень талаҕы олордорго быһаарынныбыт. Бу үтүө дьыаланы биһиэхэ эйэлээх халлааны бэлэхтээбит, олохторун толук уурбут дьоруойдарбыт сырдык кэриэстэригэр сүгүрүйэбит», – диэн Дьокуускай куорат баһылыгын солбуйааччыта Владислав Слепцов бэлиэтээтэ.

Санаттахха, Улуу Кыайыы үбүлүөйдээх сылыгар Дьокуускайга Роман Дмитриев аатынан набережнайы уонна Кыайыы болуоссатын көҕөрдүү үлэтэ ыытыллыбыта. Ол курдук, болуоссакка саҥа газон ыспыттара уонна куоракка аан бастаан автоматическай нүөлсүтэр систиэмэни туруорбуттара. Владислав Слепцов Дьокуускайга «Киин куорат күөх куубага» күрэх салҕанарын санатан эттэ. Күрэх түмүгэ Куорат күнүн чэрчитинэн, балаҕан ыйын 13 күнүгэр, Кыайыы пааркатыгар биллиэҕэ.