Дьокуускайга Улуу Кыайыы 80 сылыгар саҥа мурал уруһуйданыа

Быйыл Дьокуускай куораты саҥа мурал киэргэтиэҕэ.

Уруһуйу Аҕа дойду Улуу сэриитигэр Кыайыы 80 сылыгар аныахтара. Бу туһунан киин куорат дьаһалтатын куорат тутуутун уонна тырааныспарын инфраструктуратын департаменын отделын начаалынньыга Егор Чемезов иһитиннэрдэ.

«Мурал эскиһин куонкурус балаһыанньатыгар олоҕуран талыахтара. Бэйэлэрин этиилэрин идэлээх худуоһунньуктар эрэ буолбакка, ким баҕалаах ыытыахтарын сөп», — диэн Егор Чемезов бэлиэтээтэ. Ону тэҥэ Чемезов этэринэн, быйыл Дьокуускайга Сэбиэскэй Сойуус Дьоруойа Екатерина Демина аатынан муралы саҥардар санаалаахтар.

Мураллар куорат көстүүтүн уларыта тутууга билигин да ирдэнэр ньыманан буолаллар. Уулусса ускуустубата ураты эйгэни үөскэтэргэ, туристар болҕомтолорун тардарга, олохтоох дьону көҕүлүүргэ ананар. Саха сиригэр муралы уруһуйдааһын биир сүрүн уратытынан олохтоох култуураны уонна төрүт үгэстэри кытта ыкса сибээстээх буолар. Худуоһунньуктар үгүстэрэ саха норуотун баай нэһилиэстибэтин өрө тутан туһаналлар, мифология, фольклор уонна айылҕа элеменнэрин үлэлэригэр киллэрэллэр. Бу куорат ландшафтын байытар эрэ буолбакка, саха култууратыгар ураты болҕомтону уурарга көмөлөһөр.