Дьокуускайга Улуу Кыайыы 80 сылыгар саҥа портал үлэлээтэ

Улуу Кыайыы 80 сылын көрсө Дьокуускайга «1941-1945 сс. Аҕа дойду Улуу сэриитин сылларыгар тыыл бэтэрээннэрэ» порталы үлэлэттилэр.

Портал инники көлүөнэлэргэ анаан Аҕа дойду Улуу сэриитин кыттыылаахтарын уонна үлэ кэлэктииптэрин туһунан иһитиннэриилэри хомуйарга, түмэргэ уонна үйэтитэргэ кыах биэрэр. Дьокуускай баһылыга Евгений Григорьев этэринэн, «Үлэ килбиэнин куората» үрдүк ааты иҥэриитинэн сэрии сылларыгар үлэлээбит дьон  хорсун быһыылара үйэтитиллиэхтээх.

«Эр дьону, кырдьаҕастары сэргэ ыччаттар, дьахталлар тэрилтэлэргэ, холкуостарга,  сопхуостарга үлэлииллэрэ уонна фронт наадатыгар таһаҕаһы тиэйиини хааччыйаллара. Сэрии бастакы күннэригэр саҥа былааннар торумнаммыттара, фрону тохтоло суох хааччыйыыга улахан соруктар туруоруллубуттара. Биһиги ытык иэспит — хас биирдии киһи аатын үйэтитии.

Порталга официальнай архыып иһитиннэриилэрин булуоххутун сөп, ону сэргэ аймахтаргыт уонна чугас дьонноргут туһунан тус ахтыыларын ыытыаххытын,   Улуу Кыайыыга сүҥкэн кылааты киллэрбит тэрилтэлэри уонна үлэ кэлэктииптэрин сырдатыаххытын сөп. Итиэннэ сэдэх видео уонна хаартыска докумуоннарын, сэрии сылларыгар бэчээттэмит аҕытаассыйалыыр былакааттары, ыстатыйалары кытары билсиҥ», — диэн Евгений Григорьев ТГ-ханаалыгар  кэпсээтэ.

Санатан эттэххэ, дойду Бэрэсидьиэнэ Владимир Путин 2022 сыллаахха сэтинньи 15 күнүгэр  Арассыыйа  тоҕус куораттарыгар, ол иһигэр Дьокуускай куоракка, «Үлэ килбиэнин куората» бочуоттаах ааты иҥэрбитэ.