Дьокуускайга уонна Жатайга саастаах эр киһини уонна оҕону түҥнэри көппүттэр

Ааспыт өрөбүллэргэ Дьокуускайга уонна Жатайга саастаах эр киһи уонна оҕо суол саахалыгар эмсэҕэлээбиттэр. Ол туһунан ГАИ пресс-сулууспатыгар иһитиннэрдилэр.

Ол курдук, күнүс 16:00 чаас саҕана Жатайга 46 саастаах суоппар Nissan Wingroad массыынатынан 77 саастаах эр киһини түҥнэри көппүт. Саастаах эр киһиэхэ амбулаторнай эмтэнии ананна.

Иккис суол саахала Дьокуускайга буолбут. Быһа холоон 17:00 чаас саҕана Ленин проспегар 35 №-дээх дьиэ таһыгар 28 саастаах суоппар 12 саастаах оҕону түҥнэри көппүт. Оҕо көҥүллэммэт сиринэн суолу туораан испитэ быһаарылынна. Эмсэҕэлээбит оҕону төбөтө эчэйиилээх балыыһаҕа киллэрбиттэр.

Бу чахчыларынан бэрэбиэркэ ыытыллар.