Дьокуускайга ураты идэлээх дьахталлары кытары көрүстүлэр

Аан дойдутааҕы дьахталлар күннэрин иннинэ ураты идэлээх дьахталлар ыччаты кытары көрүстүлэр.

Араас эйгэҕэ үлэлиир – мэдиссиинэҕэ, авиацияҕа, успуорка тупсарыыга, үөрэхтээһиҥҥэ үлэлиир кэрэ аҥаардар аныгы үйэҕэ дьахтар оруолун туһунан дьүүллэстилэр.

Ыччат ураты идэлээх дьахталлар историяларын туһунан иһиттилэр. Көрсүһүүнү салайан ыыппыт Иван Луцкан ураты хорсун быһыыны, күүһү-уоҕу эрэйэр үлэлэргэ дьахтар оруолун бэлиэтээтэ.

Көрсүһүүгэ Аан дойдутааҕы дьахтар күнүн, Арассыыйаҕа ыал ийэтин, байыаннай дьайыы кыттыылаахтарын ийэлэрин, элбэх оҕолоох ийэлэри өйөөһүн туһунан дьүүллэстилэр. Тэрээһин кыттыылаахтара уопсастыбаҕа дьахтар оруолун туһунан үгүстүк эттилэр.

Бу күн Аҕа дойду көмүскээччилэрин дьиэ кэргэттэрин кэмитиэтин Саха сиринээҕи салаатын салайааччыта Марина Бахилина эҕэрдэ тылын эттэ.

«Эһиги ураты идэлээх дьоҥҥут. Мин итэҕэйэбин, эһиги бары олоххо уопуттаах дьоҥҥут уонна Аҕа дойду уонна өрөспүүбүлүкэ сайдыытыгар бэйэҕит кылааккытын киллэрэ сылдьар буолуохтааххыт. Эһигини кэлэн иһэр Аан дойдутааҕы дьахталлар күннэринэн эҕэрдэлиибин!», — диэтэ Марина Бахилина.

2019 с. өрөспүүбүлүкэҕэ пуортары саҥардыы барар. «Полярные Авиалинии» хампаанньа АН-2 сөмөлүөтүн иккис пилота Елизавета Нилова хайдах пилот буолбутун кэпсээтэ.

«Мин хаһан даҕаны бэйэм пилот буолбуппуттан хом санаабаппын. Мэлдьи үтүө суобастаахтык үлэлиир уонна идэтийбит исписэлиис буолуохпун баҕарарым. Ханна даҕаны көтөн тиийдэхпитинэ, Саха сиригэр инфрастурктура  сайдан иһэрэ көстөр», — диэн эттэ Елизавета Нилова.

Дойду көҥүл тустууга чөмпүйүөнэ, Арассыыйа успуордун маастара, «Азия оҕолоро-2008» оонньуулар кыайыылаахтара, тириэньэр уонна судьуйа ситиһиитин кистэлэҥнэрин кэпсээтэ.
«Миэхэ сыралаах дьарыгым, талааным уонна маастарыстыбам көмөлөстүлэр. Мин ийэм тустуунан дьарыктанарбын көҥүллээбэтэҕин үрдүнэн, кистээн дьарыктанан, билигин идэтийбит спортсменкабын. «Азия оҕолоро» оонньуулар өссө даҕаны аатырбыт спорсменнары бэлэхтиэхтэрэ диэн эрэнэбин», — диэтэ Виктория Барашкова.