Дьокуускайга урут сууттаммыт дьахтар соцситимнэргэ саҥа билсибит киһитин халаабыт

Дьокуускай куорат 3 №-дээх полициятын отделын дьуһуурунай чааһыгар эр киһи 5 тыһыынча солкуобайын уонна суотабай төлөпүөнүн уорбуттарын туһунан сайабылыанньа суруйбут.

Уопсай хоромньу суумата 32 тыһыынча солкуобайга тэҥнэстэ. Бу туһунан Саха сиринээҕи ИДьМ пресс-сулууспата иһитиннэрэр.

Суһал-көрдүүр тэрээһиннэрэн полиция үлэһиттэрэ уорууга уорбаланар урут сууттаммыт 37 саастаах, Мэҥэ-Хаҥалас улууһун олохтооҕо сыһыаннааҕын быһаарбыттар. Силиэстийэҕэ быһаарыллыбытынан, эмсэҕэлээччи уорбаланааччыны кытта биир социальнай ситимҥэ билсэн баран, дьиэтигэр ыҥырбыт.

Ол кэннэ эр киһи утуйа сыттаҕына, ыалдьыт дьахтар саҥа билсибит киһититтэн смартфонун уонна 5 тыһыынча солкуобайын уоран, дьиэттэн тахсан барбыт. Кэлин уоруллубут харчытын бэйэтин наадатыгар туһаммыт. «Уоруу» ыстатыйанан холуобунай дьыала тэрилиннэ.