Дьокуускайга уруу кортеһын суоппардара эппиэккэ тардылыннылар

Эдэрдэри үөрэн-көтөн эҕэрдэлиир массыыналар суоппардара суолга кутталлаах быһыыны-майгыны үөскэппиттэр, сорохторо төлөммөтөх ыстарааптаах буолан биэрбиттэр.

Бэҕэһээ социальнай ситимнэринэн видео тарҕанна. Онно уруу кортеһын кыттааччылара Покровскай трассатыгар атын суоппардарга мэһэйи үөскэтэллэрэ көстөр. Массыыналар нүөмэрдэрин эрдэттэн устан кэбиспиттэр, айан кэмигэр түннүктэртэн, ааннартан тахсаллар, ону таһынан массыыналар суол устун айаҥҥа мэһэйи үөскэтэллэр. «Дьокуускайга эдэрдэри үөрэн-көтөн, уруу кортеһын суоппардара дьоннорун массыына кабинатын таһынан таһан уонна «зигзагтыы» айаннаан, атын кыттааччыларга мэһэйи үөскэтэн, суол быраабылатын кэстилэр. Полиция үлэһиттэрэ кортеж састаабыгар киирэр биэс массыына суоппарын кимнээхтэрин быһаардылар, кинилэр административнай эппиэтинэскэ тардылыннылар», — диэн Госавтоинспекция иһитиннэриитигэр этиллэр. Маны таһынан, сорох суоппардар төлөммөтөх ыстарааптаахтара быһаарылынна. Ол иһин кинилэргэ эбии административнай боротокуол толорулунна.