Дьокуускайга Валерий Лютай Аҕа дойдуну көмүскэччилэрин күнүн көрсө «Эр санааланыы» уруогу ыытта

Владимир Путин итэҕэллээҕэ, Афганистан бойобуой дьайыытын кыттыылааҕа, Афганистан бэтэрээннэрин Сойууһун бэрэссэдээтэлэ Валерий Лютай Дьокуускайга Аҕа дойдуну көмүскэччилэрин  күнүн көрсө кадеттарга уонна юнармеецтарга «Эр санааланыы» уруогун ыытта.

«Билигин төрөөбүт дойдуларыгар сулууспалыыр оҕолору кытта көрсүһүүлэри тэрийии олус наадалаах. Эһиги – биһиги судаарыстыбабыт тирэҕэ буолаҕыт. Ол иһин кэлэрим наада буоллаҕа», — диэн мустубуттары Валерий Лютай эҕэрдэлээтэ.

Уруок кэмигэр Афганистаҥҥа разведчигынан сулууспалаабытын, ону тэҥэ байыаннай дьайыы кыттыылаахтарын билиҥҥи хорсун быһыыларын туһунан кэпсээтэ. Кини Афганистан сэриитин кэмигэр ол-бу кистэммитин, этиллибэтэҕин, оччотугар нэһилиэнньэ сөбүлээбэтэҕэ тахсыбытын туһунан кэпсээтэ. Ол иһин ыччаты кытта анал байыаннай дьайыы тиэмэтигэр аһаҕас кэпсэтии ыытыллара суолталааҕын  бэлиэтээтэ.

«Уолаттары кытары байыаннай дьайыы туһунан кэпсэтиилэрбитигэр биһиги тугу да кистээбэппит —  ити дьыалабыт кырдьыктаах. Чахчылаах холобурдарга олоҕуран, ыччаттарга байыаннай дьайыы  суолтатын уонна сыалын-соругун тиэрдэбит», — диэн кини эбэн эттэ.

Валерий Лютай салгыы оҕолорго патриотизм туһунан кэпсээтэ.

«Патриотизм – бастатан туран, дьон быһыыта-таһаата. Үтүө дьыаланы оҥордоххутуна, аҕам саастаах киһиэхэ көмөлөстөххүтүнэ, бөҕү хомуйдаххытына, мөлтөх дьону көмүскээтэххитинэ, маны барытын холобурдаан эттэххэ, ити хардыылар эһигини патриотизмҥа тиэрдиэхтэрэ. Патриотизм диэн дьоруойдуу буолуу эрэ буолбакка, кыралаан чиэһинэйдик оҥорор  дьайыыларгыт. Ийэ дойдуга таптал эмиэ кыраттан саҕаланар. Барыта эһиги илиигитигэр — иннкибит, кэскилбит. Ону эмиэ эһигини кытта оҥоруохпут», — диэн кини кэпсээтэ.

Санатан эттэххэ, урут РФ Киин быыбардыыр хамыыһыйата 544 быһаарыы ылыммытыттан иккитигэр Владимир Путин итэҕэллээхтэрин испииһэгин бигэргэппитэ. Онно култуура, ускуустуба, успуорт, урбаан, мэдиссиинэ эйгэтин бэрэстэбиитэллэрэ киирбиттэрэ. Олор истэригэр актердар Сергей Безруков уонна Владимир Машков, режиссер Никита Михалков, дирижер Юрий Башмет, тириэньэр Ирина Винер, о.д.а. бааллар. Итэҕэллээх дьон ыстаатыһын дойду бары эрэгийиэннэрин ытыктабыллаах бэрэстэбиитэллэрэ ылбыттара.

Арассыыйа Бэрэсидьиэнин быыбара быйыл  кулун тутар 15-17 күннэригэр ыытыллыаҕа. Киин быыбардыыр хамыыһыйа түөрт хандьыдааты регистрациялаабыта. Кинилэр ортолоругар билигин дойду Бэрэсидьиэнин дуоһунаһыгар үлэлиир Владимир Путин бэйэ туруорунуу хандьыдаатынан баар. Ону кытта Николай Харитонов (РФКП), Леонид Слуцкай (ЛДПР) уонна Владислав Даванков («Новые люди»).