Дьокуускайга Владимир Путины өйүүр илии баттааһыны хомуйар үс саҥа пуун аһылынна

Дьокуускай араас микро-түөлбэлэригэр Владимир Путины өйүүр илии баттааһыны хомуйар үс саҥа мобильнай пуун аһылынна. Ол курдук, пууннар «Туймаада», «СахаЭкспоЦентр» уонна «Ураса Молл» атыы-эргиэн кииннэригэр бааллар. 

Мобильнай пууннарга илии баттааһыны хомуйуунан волонтердар дьарыктаныахтара. Кинилэр инструктаж ааспыттара. Владимир Путины өйүүргэ ким баҕалаах кэлэн илиитин баттыан сөп. Ол туһуттан Арассыыйа гражданина буолар паспорт эрэ ирдэнэр. Пууннар 13:00 чаастан 20:00 чааска диэри үлэлииллэр.

Санатан суруйдахха, Дьокуускайга ахсынньы 23 күнүттэн илии баттааһыны хомуйар былаһаакка «Столица» атыы-эргиэн дьиэтигэр бастакы этээскэ (Ленин уул., 16) үлэлиир. Бу былаһаакка «Бүтүн Арассыыйатааҕы норуот фрона» ыччатын көҕүлээһининэн аһыллыбыта. Волонтердар күннэтэ сарсыарда 10 чаастан 20 чааска диэри үлэлиилэр. Бырааһынньык күннэригэр ахсынньы 31 күнүгэр, тохсунньу 1,2 күннэригэр эрэ өрүөхтэрэ.