Дьокуускайга “ВОИН” киин курсааннарыгар Бүтүн Арассыыйатааҕы турнир ыытыллыаҕа

РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, “ВОИН” киин кэтээн көрөр сэбиэтин бэрэссээдээтэлэ Юрий Трутнев Хабаровскайга ыытыллыбыт уокурук сэбиэтигэр «ВОИН» киин иитиллээччилэрин ортолоругар бастакы турнир ыытылларын туһунан иһитиннэрдэ.

“Юрий Петрович Трутнев көҕүлээһининэн балаҕан ыйыгар Дьокуускайга киин курсааннарын ортолоругар Бүтүн Арассыыйатааҕы бастакы турнир – “Путь ВОИНа” киэҥ далааһыннаах байыаннай-тактическай күрэхтэһии ыытыллыаҕа. Бу биһиги өрөспүүбүлүкэбитигэр улахан чиэс, эппиэтинэс буолар. Биһиги бииргэ үлэлэһэргэ бэлэммит уонна турниры үрдүк таһымнаахтык ыытар туһугар күүспүтүн ууруохпут”, – диэн Ил Дархан Айсен Николаев мунньах түмүгүнэн санаатын үллэстэригэр бэлиэтээтэ.

Турнир соруга – кыттааччылары личность быһыытынан, өй, сиэр-майгы, эт-хаан өттүнэн сайыннарыы, алын байыаннай бэлэмнэнии сатабылларын иҥэрии, ону бигэргэтии, Аҕа дойдуну көмүскээһиҥҥэ гражданскай иэһин уонна конституционнай эбээһинэһин  толорууга бэлэм буолууну иҥэрии.

“Бэлэмнэнии таһымын сыаналыырга Бүтүн Арассыыйатааҕы турнир ыытыллыаҕа – “Путь ВОИНа” байыаннай-тактическай күрэхтэһии. Турнир быһа холуйан Саха сиригэр балаҕан ыйыгар тэриллиэҕэ, “ВОИН” киин курсааннарыгар аналлаах биир саамай улахан күрэхтэһии буолуоҕа”, – диэн Юрий Трутнев бэлиэтиир.

Былаан быһыытынан, күрэхтэһии кыттыылаахтара хамандыыры, снайперы, БПЛА операторын, ытааччылары, саперу уонна санитары киллэрэн туран уоннуу киһилээх хамаандаларга арахсыахтара. Турнир хаамыытын уонна куттала суох ыытыллыытын “ВОИН” киин уопуттаах инструктордара кэтээн көрүөхтэрэ, ону тэҥэ, салалта ыстаабыгар БПЛА оператордара уонна эвакуациялыыр хамаанда киириэхтэрэ.

“Хас биирдии киин 10 киһилээх хамаанда туруоруоҕа. “ВОИН” киин 21 салаата үлэлиир. Күрэхтэһиигэ барыта 210 киһи кыттыаҕа. Саамай сүрүнэ, күрэхтэһии оҕолор толкуйдуу үөрэнэллэригэр туһаайыллар. Байыаннай дьайыыга киһиэхэ саамай сүрүн – толкуй. Автомат, пулемет эбэтэр атын туох эмэ буолбатах, чопчу толкуй. Биһиги уолаттары толкуйдуурга, миэстэ уратытын учуоттуурга,  утарсааччы хотторор кыахтаах ньымаларын туһанарга уонна ону дьүөрэлээн кыайарга үөрэтиэхпитин баҕарабыт. Өскөтүн биһиги уолаттары оннук үөрэттэхпитинэ – кыайыахпыт. Чопчу ол курдук сорук турар. Турнир оонньуурга, сүүрэргэ анаммат, уустук тактическай балаһыанньаҕа толкуйдуурга үөрэтии”, – диэн Юрий Трутнев бэлиэтиир.

Санатан эттэххэ, “ВОИН” киин филиаллара Арассыыйа 21 эрэгийиэнигэр, ол иһигэр Уһук Илин 5 субъегар аһыллыбыта:  Бурятияҕа, Саха сиригэр, Хабаровскай кыраайга, Сахалин уобалаһыгар,  Камчаткаҕа. Номнуо 77 980 курсант бэлэмнэниини ааста. 8 тыһ. тахса алын байыаннай бэлэмнээһин преподавателэ киин баазатыгар хаттаан үөрэниини барбыта.

Бу туһунан Ил Дархан уонна Бырабыыталыстыба пресс-сулууспата суруйар.