Дьокуускайга ыам ыйын 24 күнүгэр арыгы атыытын бобуохтара

Дьокуускайга «Бүтэһик чуораан» бырааһынньыктара ыытыллалларынан сибээстээн, ыам ыйын 24 күнүгэр арыгы атыытын бобуохтара. Бу туһунан киин куорат баһылыга Евгений Григорьев иһитиннэрдэ.

«Бу быһаарыныы «Бүтэһик чуораан» бырааһынньыктара ыытыллар кэмигэр куттал суоһаабатын туһугар ылынылынна. Куорат устунан тыһыынчанан оҕолор күүлэйдиэхтэрэ», — диэн Евгений Григорьев телеграм-ханаалыгар иһитиннэрдэ.

Итиэннэ кини арыгыны атыылыыр уонна уопсастыбаннай аһыыр сирдэрдээх урбаанньыттар маны тутуһалларыгар ыҥырда.

Дьокуускайга «Бүтэһик чуорааннар» ыам ыйын 24 күнүгэр ыытыллыахтара, выпускнойдар бэс ыйын 28 күнүгэр буолуохтара. Бу дааталары РФ Үөрэҕирии министиэристибэтин рекомендациятынан уонна СӨ Үөрэх министиэристибэтин бирикээһинэн талбыттар.