Дьокуускайга үөрэх үлэһиттэрин атырдьах ыйынааҕы сүбэ мунньаҕа саҕаланна

Атырдьах ыйын 19 күнүттэн 23 күнүгэр диэри киин куоракка педагогтары, үөрэх тэрилтэлэрин салайааччыларын, төрөппүт уопсастыбаннаһын, уопсастыбаннай түмсүүлэри уонна федеральнай эспиэрдэри түмэр үөрэх үлэһиттэрин үгэс буолбут атырдьах ыйынааҕы сүбэ мунньаҕа ыытыллар.

Пуорум сүрүн сыала — уопуту атастаһыы, өрөспүүбүлүкэ үөрэҕин систиэмэтин сайыннарыыга аныгы кэм ыҥырыыларын ырытыы уонна көдьүүстээх быһаарыылары көрдөөһүн.

Быйыл пуорум бырагыраамата биэс сүрүн хайысханан ыытыллар:

• «Үөрэхтээһин тоҕоостоох боппуруостара» — саҥа бырагыраамалар, үөрэтии ньымалара, каадырынан хааччыйыы уонна уһуйуу;
• «Үөрэхтээһин уонна дьиэ кэргэн» — оҕолору дойдуга бэриниилээх буолуу, култуураҕа уонна үгэстэргэ убаастабыллаахтык сыһыаннаһыы тыыныгар иитии, дьиэ кэргэн сыаннастарын бөҕөргөтүү;
• «Үөрэхтээһин уонна технологиялар» — үөрэхэ аныгы сыыппара үнүстүрүмүөннэрин уонна технологияларын туһаныы;
• «Үөрэхтээһин уонна оҥорон таһаарыы» — оскуола үөрэнээччилэрин уонна устудьуоннары өрөспүүбүлүкэ тэрилтэлэрин кытта бииргэ үлэлээн, кэлэр идэлэригэр бэлэмнээһин, карьераларын тускулун оҥоруу;
• «Үөрэхтээһин уонна билим» — үөрэнээччилэр чинчийэр уонна бырайыактыыр үлэлэрин сайыннарыы.

Сүбэ мунньах методическай сэминээрдэр, төгүрүк остуоллар, панельнай дискуссиялар, маастар-кылаастар уонна кэпсэтэр былаһааккалар  ыытыллаллар. Сүрүн тэрээһининэн Ил Дархан Айсен Николаев кыттыылаах пленарнай мунньах буолуоҕа.

Үгэс быһыытынан, пуорум чэрчитинэн педагогическай үлэ миэстэтин дьаарбаҥката тэриллэр, манна педагогтар уонна педагогическай хайысханы бүтэрбит эдэр исписэлиистэр үлэ булуохтарын сөп. Дьокуускай куорат олохтоохторугар уонна ыалдьыттарыгар култуурунай бырагыраама бэлэмнэннэ: педагогтар, устудьуоннар этэрээттэрин, оҕолор сайыҥҥы сынньалаҥнарын тэрийээччилэр кэнсиэртэрэ, ону таһынан «Үүнүү – 2025» тыа хаһаайыстыбатын эдэр исписэлиистэрин ситиһиилэрин өрөспүүбүлүкэтээҕи быыстапка-куонкурус.

Үөрэх үлэһиттэрин атырдьах ыйынааҕы сүбэ мунньаҕын сиһилии бырагырааматын мунньах саайтыгар бу сигэнэн киирэн билсиэххэ сөп: https://августовское14.рф/#!/tab/1218151021-5

Үөрэх үлэһиттэрин атырдьах ыйынааҕы сүбэ мунньаҕа РФ Бэрэсидьиэнэ Владимир Путин көҕүлээбит «Эдэр ыччат уонна оҕолор» национальнай бырайыак сыалларыгар уонна соруктарыгар сөп түбэһэр.