Дьокуускайга үөрүүлээх быһыыга-майгыга Сбер “21 оскуоланы” астылар

Бүгүн Дьокуускайга үөрүүлээх быһыыга-майгыга Уһук Илин уокурукка аан маҥнайгы, Арассыыйаҕа алтыс Сбер “21 оскуоланы” астылар.

Тэрээһиҥҥэ Сбербаан бэрэсидьиэнэ — Бырабылыанньатын бэрэссэдээтэлэ Герман Греф, Ил Дархан Айсен Николаев, Бырабыыталыстыба бэрэссэдээтэлин солбуйааччы Анатолий Семенов, Инновацияҕа миниистир Василий Ефимов, о.д.а. кытыннылар.

“Саха сирэ үрдүк технологияларга толкуйдаан туран суоттанна, бу киһи хапытаалын сайдыытын ирдиир. Манна үөрэнэн тахсар каадырдар АйТи хампаанньаларга эрэ буолбакка, судаарыстыбаннай управлениелартан саҕалаан оҥорон таһаарыыга тиийэ үлэлиэхтэрэ. Ситиһиини! Манна үөрэнээччилэр Сбертан сулустар бөлөхтөрүнэн суһумнуур бриллиант буолалларыгар эрэнэбин”, — диэн Айсен Николаев эттэ.

Герман Греф тыл этиитин Саха сирэ маннык эдэр, тэтимнээх уонна стратическай толкуйдаах салайааччылааҕынан дьоллоох диэн этииттэн саҕалаата.  “21 оскуола” бырайыак өссө саҕаланарын саҕана бу каадыры бэлэмнээһиҥҥэ улахан өрө тахсыы, дойдуга бөдөҥ инвестирование буолара биллибитэ. Күн бүгүн  4 тыһ. тахса устудьуон үөрэнэр, 400 тыһ. тахса киһи оскуолаҕа үөрэнэ киирэр. Кинилэр үлэҕэ өрө тахсыыларын кэтээн көрдүбүт, биһиги атын үлэһиттэрбитинээҕэр ортотунан 2,5 төгүл түргэнник өрө тахсаллар. Оскуола бастыҥнары, квалификациялаахтары буолбакка, саамай  баҕалаахтары (мотивированных) ылар. Бу аан дойдуга саамай көдьүүстээх уонна үөрэх аныгы модела буолар. Салгыы исписээлинэстэрбитин кэҥэтиэхпит. Аны 5-7 сылынан Саха сирин “21 оскуоланы” бүтэрээччилэр өрөспүүбүлүкэ эрэ буолбакка, дойду инники олоҕун хамсатар дьон буолуохтара диэн толкуйдаахпын”, — диэн Сбербанк бэрэсидьиэнэ, Бырабылыанньатын бэрэссэдээтэлэ Герман Греф бэлиэтээтэ.

Кампус уопсай иэнэ 1900 кв.м. тахсаҕа тэҥнэһэр. Оробуочай ыстаансыйатын ахсаана 198. Үөрэнэр куорпус аныгы офиска майгынныыр. Дьиэттэн тахсыбакка эрэ суукканы эргиччи үлэлиэххэ, сынньаныахха, аһыахха сөп. Маныаха сөптөөх усулуобуйа барыта тэриллибит.

“21 оскуола” – бу Сбер 18-тан үөһэ саастаах дьону АйТи эйгэҕэ программированиеҕа босхо үөрэнэр кыаҕы биэрэр. Кыттааччылар Москва, Казань, Новосибирскай, Сургут, Великай Новгород куораттарга аһыллыбыт оскуолалар кампустарыгар үөрэнэллэр. Күн бүгүн 4110 киһи үөрэнэр, 2300 үлэ үөрүйэҕин ааһаллар (стажировка), ону тэҥэ, дойду бөдөҥ АйТи хампаанньалыгар, стартаптарга үлэҕэ киирбиттэр.

“21 оскуолаҕа” үөрэнэ киирэргэ урукку билии, үлэҕэ уопут, программированиены сатыыллара-сатаабаттара, дьупулуом оруолу оонньообот. Үлэһиттэр иһитиннэрбиттэринэн, бырайыакка кыттааччы 50-тан тахса бырыһыана программированиеҕа бастакы уопуту манна үөрэнэн ыллыбыт дииллэр эбит. Аны биир интэриэһинэйэ — “21 оскуолаҕа” уһуйааччы, лиэксийэ, сыана диэн суох. Бэйэ-бэйэлэриттэн уопут атастаһаллар, кими тугу билбитин үллэстэн үөрэнэллэр. Биирдиилээн эбэтэр быарайыактары толорууга хамаанданан сорудахтар бааллар. Үөрэх болдьоҕо кыттааччыттан бэйэтиттэн тутулуктаах, 1,5-3 сыл буолар.

“21 оскуолаҕа” үөрэххэ туттарсыы икки түһүмэхтэн турар:

1. 21-school.ru саайтка сайаапка ыытыллар

2. Өйгө тутар дьоҕуру уонна логиканы бэрэбиэркэлииргэ икки онлайн оонньууну ааһаллар.

3. Интенсив (түмүктүүр сүүмэрдиир түһүмэх) ааһарга 26 күн “21 оскуола” кампуһугар олоҕурбут көрүҥүнэн тиийэн үөрэнэллэр. Манна С программирование тылын кылгас кууруһун үөрэтэллэр, кыттааччылар биирдиилээн уонна кэлэктиибинэн бырайыактары толороллор. Интенсив түмүгүнэн кыттааччылары сүрүн үөрэххэ сүүмэрдииллэр.