Дьокуускайга «Үрүҥ хаар алгыһа» поэзия бэстибээлэ саҕаланна

«Үрүҥ хаар алгыһа» поэзия аан дойдутаҕы VII бэстибээлэ алтынньы 11 күнүгэр үөрэх-билии биһигэ буолбут, поэзияны сэҥээрээччилэр үөрэнэр М.К.Аммосов аатынан Хотугулуу-Илиҥҥи федеральнай университет Култууратын киинигэр үөрүүлээх быһыыга-майгыга аһылынна.

Поэзия бэстибээлэ Аксения уонна Наталья Посельскайалар ааттарынан  Балет оскуолатын (кэллиэһин), Муусука үрдүкү оскуолатын үөрэнээччилэрин, «Айархаан» фольклор бөлөҕүн эҕэрдэ толорууларынан саҕаланна. Кырачаан оҕолор норуодунай бэйиэт Семен Данилов хаар туһунан хоһоонун нууччалыы тылынан аахтылар. Устудьуоннар бүгүн бэстибээлгэ ыалдьыттыы кэлбит бэйиэттэр чуолаан хаар туһунан айбыт хоһооннорун доргуччу ааҕан, кинилэр айар үлэлэриттэн көрөөччүгэ сэгэтэн ыллылар.

Поэзия бэстибээлигэр кэлбит ыалдьыттары уонна бэстибээл ааптарын, сүрүн тэрийээччини Наталья Ивановна Харлампьеваны, поэзияҕа сүгүрүйээччилэри СӨ бырабыыталыстыбатын бэрэссэдээтэлин солбуйааччы Сергей Местников, СӨ Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччы Александр Жирков, М.К.Аммосов аатынан ХИФУ каадыр бэлиитикэтигэр дириэктэрин солбуйааччы Михаил Федоров эҕэрдэлээтилэр. Кинилэргэ саха суруйааччыларын айымньыларын тылбаастааһыҥҥа, айар дьон сибээһин олохтуурга көхтөөх үлэлэрин уонна Саха сирин култууратын, духуобунаһын сайдыытыгар кылааттарын иһин махтал суруктары туттардылар. СӨ бырабыыталыстыбатын махтал суругунан бэйиэттэр Айрат Бик-Булатов (Татарстан), Куджебелдьу Кулиев (Дагестан), Ил Түмэн махтал суругунан СӨ норуодунай бэйиэтэ Наталья Харлампьева, Вячеслав Куприянов (Москва), Супиянат Мамаева (Дагестан) уо.д.а. наҕараадаланнылар.

СӨ норуодунай бэйиэтэ Наталья Харлампьева: «Бэйиэттэр — сир үрдүгэр араас омуктар, дойдулар дьоннорун ситимниир, сомоҕолуур дьон. «Үрүҥ хаар алгыһа» бэстибээл өссө 2012 сыллаахха норуодунай бэйиэппит Семен Данилов хаар туһунан хоһоонун устуруокаларыттан саҕаламмыта. Хас биирдии киһи бэйэтин хаар киһинэн буолбакка, нарын-намчы киһинэн ааҕынар. Тоҕо диэтэххэ, биһиги хаардаах кыйаарга улааппыппыт, хаартан куттаммаппыт, олохпут тухары хаар алгыһынан олоробут. Бэстибээл ыытыллар буолан, Сахабыт сирин бэйиэттэрин хоһоонноро аан дойду араас тылынан тылбаастаннылар. Ол түмүгэр биһиги норуоттарбыт бэйэ-бэйэлэрин өйдөһөллөр», -– диэн бэстибээл кыттыылаахтарын эҕэрдэлээтэ.

Бу үөрүүлээх күн Наталья Харлампьева нуучча литературатыгар кылаатын иһин Арассыыйа Суруйааччыларын сойууһун үрдүк наҕараадатынан – Пушкин кыһыл көмүс мэтээлинэн наҕараадаланна.

Саха сиригэр ыытыллар бэстибээлгэ быйыл Москваттан, Махачкалаттан, Архангельскайтан, Уфаттан, Казаньтан, Казахстантан, Киргизияттан уо.д.а. суруйааччылар, тылбаасчыттар уонна суруйааччылар тэрилтэлэрин салайааччылара кэлбиттэр. Кинилэр истэригэр Анемподист Софронов-Алампа «Ыллыым ээ, ыллыым» хоһоонун тылбаастаабыт (32 тылга тылбаастаммыта) суруйааччылар Кожогелды Култегин (Кыргызстан), Вячеслав Куприянов, Сергей Гловюк, уо.д.а. бааллар. Аан дойдутааҕы бэстибээл ыытыллар буолан, Саха сирин үгүс суруйааччытын айымньылара араас норуот тылыгар тылбаастанан, киэҥ араҥаҕа тарҕанар. Ол курдук, бэстибээл ыытыллар кэмигэр «Антология современной якутской поэзии» поляктыы, Б. Ойуунускай кинигэтэ азербайджанныы,  Наталья Харлампьева уонна Евдокия Иринцеева-Огдо кинигэлэрэ английскайдыы  уо.д.а. тылбаастаннылар.

«Үрүҥ хаар алгыһа» бэстибээл алтынньы 14 күнүгэр диэри ыытыллар. Күндү ыалдьыттарбыт суруйааччылар бу кэм устата Дьокуускай куорат үөрэҕин тэрилтэлэригэр, поэзия биэчэрдэригэр, литература сайдыытыгар аналлаах «төгүрүк остуолларга» уонна Горнай улууһугар ини-бии Даниловтар мусуойдарыгар, норуодунай худуоһунньук Афанасий Осипов галереятыгар ыалдьыттыахтара.