Дьокуускайга «Үс Хатыҥ» диэки тоҕус саастаах оҕо сүттэ

Бүгүн, алтынньы 13 күнүгэр, Дьокуускайга «Үс Хатыҥ» комплекс диэки доруобуйатыгар хааччахтаах тоҕус саастаах уол оҕо сүппүтүн туһунан 15:53 чааска СӨ Быыһыыр сулууспатыгар иһитиннэрии киирбит.

Өрөбүл күнү салгыҥҥа атаараары, дьиэ кэргэн манна сынньана тиийбит. Ыал аҕата тыаҕа тахсыбыт, оттон ийэлэрэ уот отто сылдьыбыт. Ол кэмҥэ оҕолоро массыынаҕа олорбут. Онтон хайа эрэ түгэҥҥэ оҕо массыынаттан тахсан барбыт, ону төрөппүттэрэ көрбөккө хаалбыттар. Быһа холоон 15 мүнүүтэ буолан баран биирдэ уоллара сүппүтүн бэлиэтээбиттэр. Бастаан утаа бэйэлэрэ көрдүү сатаабыттар да, булбатахтар. Ол иһин Быыһыыр сулууспаҕа эрийбиттэр.

Сүппүт оҕону көрдүү диэн, икки массыынанан аҕыс быыһааччы туруммут. Аэромобильнай этэрээт быыһааччыта Герман Филиппов хаарга оҕо атаҕын суолун көрөн, ону батыспыт. Өр буолбакка, уол алаас түгэҕэр турарын булбут.

Уол доруобуйатыгар туох да суоһаабат, кыратык тоҥмут эрэ диэн СӨ Быыһыыр сулууспатын пресс-сулууспата иһитиннэрэр.