Дьокуускайга үстүү игирэлээх икки ыал оҕолорун үөрүүлээх быһыыга-майгыга таһаардылар

Дьокуускайга Саҥа дьылы көрсө Өрөспүүбүлүкэтээҕи 1-кы нүөмэрдээх балыыһа перинатальнай киинигэр – Мэдиссиинэ национальнай киинигэр сэтинньи 12 уонна 27 күннэригэр төрөөбүт  үстүү игирэлээх икки ыал оҕолорун үөрүүлээх быһыыга-майгыга төрүүр дьиэттэн таһаардылар.

Үстүү игирэлэр Туйаара, Реворий Елисеевтарга уонна Олеся, Николай Старостиннарга күн сирин көрдүлэр. Кырачааннар ый кэриҥэ исписэлиистэр харахтарын далыгар улааттылар.

Алта кырачааны – биир кыыһы уонна биэс уолу Байхан, Санаайа уонна Байаан Елисеевтар, Эльдар, Ренат уонна Прокопий Старостиннар диэн сүрэхтээтилэр.

Ил Дархан Айсен Николаев өйөбүлүнэн Елисеевтэр уонна Старостиннар дьиэ кэргэҥҥэ харчынан көмө туттарылынна.

Бу икки ыал дьиэ кэргэн хас киһилээҕиттэн тутулуктанан, олорор дьиэни тупсарыыга биир кэмнээх төлөбүр көрүллүүтүгэр сэртипикээти ыллылар. Ол курдук, Елисеевтэргэ 4 687 168,50 солк.,  Старостиннарга  6 562 035,90 солк.

Маны тэҥэ, бу ыалга 332 325 солк. уопсай суумалаах “Сүүс сыл оҕолоро” тус хапытааллаах сэртипикээти, элбэх оҕолоох дьиэ кэргэн дастабырыанньатын итиэннэ түөскэ иилинэр бэлиэни туттардылар.

Итини тэҥэ, Туйаара, Реворий Елисеевтэргэ иккис оҕолоро төрөөбүтүнэн 249 907 солк. кээмэйдээх эрэгийиэннээҕи ийэ хапытаалын сэртипикээтин биэрдилэр.

Кырачааннары балыыһаттан атаарар бэлиэ күҥҥэ доруобуйа харыстабылын миниистирэ Лена Афанасьева, 1-кы нүөмэрдээх өрөспүүбүлүкэтээҕи балыыһа – Мэдиссиинэ национальнай киинин уопсастыбаннай кураатара Людмила Николаева, “Арассыыйа ийэлэрэ” уопсастыбаннай хамсааһын Саха сиринээҕи салаатын бэрэссэдээтэлэ Прасковья Борисова, өрөспүүбүлүкэ үлэҕэ уонна социальнай сайдыыга миниистирин солбуйааччы Наталья Черноусова кэлэн эҕэрдэлээтилэр.

Дьиэ кэргэн уонна Оҕо саас сылларыгар Саха сиригэр үстүү игирэлээх үс ыал оҕолонно. Бастакы игирэлэри атырдьах ыйыгар үөрүүлээх быһыыга дьиэлэригэр атаарбыттара. Үс кырачаан Анастасия, Владислав Степановтар дьиэ кэргэҥҥэ төрөөбүтэ. Эдэр ыал тута элбэх оҕолоох ыал аатын сүкпүтэ.

Санатан эттэххэ, Ил Дархан Айсен Николаев анал туһаайыытыгар “Дьиэ кэргэн” өрөспүүбүлүкэтээҕи ийэ хапытаалын үһүс оҕоҕо эрэ буолбакка, төрдүс уонна онтон кэлэр оҕолорго эмиэ көрөр ирдэнэр диэн этэн турар. Билигин сокуон барыла оҥоһулла сылдьар. Докумуону үүнэр сыл бастакы кыбартаалыгар Ил Түмэн көрүүтүгэр киллэриэхтэрэ. Сиһилии манна ааҕыҥ.

Ил Дархан уонна Бырабыыталыстыба пресс-сулууспата.