Дьокуускайга «Юнармия» хамсааһын сүлүөтэ саҕаланна

Дьокуускайга кадеттар лицей-интэринээттэригэр “Юнармия” өрөспүүбүлүкэтээҕи хамсааһын IX патриотическай сүлүөтэ саҕаланна.

Тэрээһиҥҥэ 14 улуустан, куорат уокуругуттан  140 оскуола үөрэнээччитэ кыттар.

“Сүлүөт байыаннай-патриотическай оонньуу, күрэхтэһии эрэ курдук ис хоһоонноох буолбакка, бэйэ-бэйэҕитин кытта билсии, уопут атастаһыы быһыытынан барыаҕа. Бу тэрээһин өйгүтүгэр-санааҕытыгар өр кэмҥэ хаалыаҕа. Сүлүөт кэмигэр ылбыт үөрүйэхтэргит инникитин идэҕитин талыыга  көмөлөөх буолуоҕа», — диэн СӨ Ыччат дьыалаларыгар уонна социальнай коммуникацияларга миниистири бастакы солбуйааччы Надежда Мохначевская бэлиэтээтэ.

Тэрээһин ыытылларын устата “Юнармия” чилиэннэрэ бэйэлэрин сатабылларын, кыахтарын уонна дьулуурдарын араас күрэхтэһиилэргэ, турнирдарга көрдөрүөхтэрэ.