Дьокуускайга «Звезднай» түөлбэҕэ керлинг тыраассалаах саҥа каток аһылынна

Дойду бэрэсидьиэнэ Владимир Путин көҕүлээһининэн ыытыллыбыт «Демография» национальнай бырайыак чэрчитинэн, Дьокуускай куоракка саҥа «Звезднай» түөлбэҕэ дьиэ иһигэр катоктаах элбэх функциялаах успуорт комплекса аһылынна. Бу Саха сиригэр анал керлинг суоллаах аан бастакы успуорт эбийиэгэ буолар диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Үөрүүлээх тэрээһиҥҥэ Айсен Николаев кыттыыны ылла. Ил Дархан саҥа эбийиэк кэлэктиибин, спортсменнары уонна түөлбэ олохтоохторун эҕэрдэлээтэ уонна спортивнай инвентарь атыылаһарга сэртипикээт туттарда.

«Бу өрөспүүбүлүкэ киин куоратыгар дьиэ иһинээҕи үһүс катогунан буолар. Аныгы кэм ирдэбилигэр барытыгар эппиэттиир, туспа спортивнай саалалаах, хоккейдыыр былаһааккалаах, өрөспүүбүлүкэҕэ бастакы анал керлинг тыраассалаах эбийиэги аһан эрэбит. Манна мууһу кытта сибээстээх успуорт үгүс көрүҥэ сайдыаҕа диэн мин эрэллээхпин. Маннык эбийиэктэр өрөспүүбүлүкэҕэ сыллата элбээн иһэллэрэ киһини үөрдэр. Кэлиҥҥи сылларга бассейннартан саҕалаан, адаптивнай успуорт саалаларыгар тиийэ, 50-тан тахса улахан успуорт эбийиэгэ тутулунна. Ити сөп, тоҕо диэтэххэ, сайдыылаах өрөспүүбүлүкэҕэ дууһатынан, этинэн-сиининэн доруобай дьон наадалар. Биһиги оҕолорбут кыра эрдэхтэриттэн маннык бэртээхэй усулуобуйаҕа дьарыктанар кыахтаннылар. Манна, саҥа оскуолалаах, оҕо уһуйааннаах, балыыһалаах – табыгастаах инфраструктуралаах “Звезднай” саҥа түөлбэҕэ тутуллубута ордук суолталаах», — диэтэ Айсен Николаев.

Ил Дархан олохтоохторго дойду бэрэсидьиэнин Владимир Путин эҕэрдэтин уонна оҕолорго баҕа санаатын тиэртэ.

«Оруобуна манна киирэн истэхпинэ биһиги бэрэсидьиэммит Владимир Владимирович Путин төрөөбүт күммүнэн эҕэрдэлээн эрийбитэ. Киниэхэ мин бүгүн федеральнай бырагырааманан тутуллубут саҥа икки оскуоланы арыйбыппытын, билигин дьиэ иһинээҕи катогу арыйарбытын кэпсээтим. Бэрэсидьиэн оҕолорго чэгиэн-чэбдик доруобуйаны, дьоллоох, күүстээх санаалаах, дьиҥнээх патриот, Ийэ дойдубут көмүскээччилэрэ, олоҕу хамсатар кыахтаах дьон буола улаатыҥ диэн баҕа санаатын оҕолорго тириэртэ», — диэн Айсен Николаев санаатын үллэһиннэ.

Кыһыҥҥы көрүҥнэргэ өрөспүүбүлүкэтээҕи анал спортивнай оскуола иитиллээччилэрэ Арассыыйа Федерациятын уонна Саха сирин былаахтарын тутан тасхан муус манеж тула бочуоттаах эргиир оҥордулар. Саҥа катокка эдэр спортсменнар хоккейга бастакы киирсиилэригэр Айсен Николаев символическай шайбаны бырахта.

Саҥа успуорт комплексыгар Дьокуускай куорат 10-с №-дээх успуорт оскуолатын иитиллээччилэрэ дьарыктаныахтара.

«Мин Ягодкин аатынан 19-с №-дээх оскуолаҕа үөрэнэбин, «Эллэй Боотур» дыбарыаска дьарыктанабын. Бүгүн манна бастакы дьарык уонна хоккейга күрэхтэһии буолан ааста. Мин олус астынным», — диэн Анатолий Самодаев санаатын үллэһиннэ.

Оттон 10-с №-дээх успуорт оскуола дириэктэрэ Михаил Шилов саҥа комплекска оҕолорго анаан аҕыс көрүҥҥэ дьарыктар ыытыллыахтара. Ол иһигэр муус аренаҕа – хоккейга, фигурнай хаҥкыга, шорт-треккэ, керлиҥҥэ, оттон оонньуур саалаҕа — волейбол, футбол, бокса, тустуу диэн кэпсээтэ кини.

Икки этээстээх, 5000 квадратнай миэтэрэ иэннээх спортивнай комплекска 210 көрөөччү миэстэлээх аныгы хоккей былаһаакката баар. Эбийиэккэ өссө керлинг саалата, спортсаала, футболга уонна волейболга аналлаах спортивнай саала бааллар. Манна араас саастаах дьон эт-хаан өттүнэн доруобуйаларын чэбдигирдэллэригэр дьарыктанар кыах толору бэриллэр.