Дьокуускайга бөх полигонун тутуу салҕанар

Дьокуускайга Бүлүүлүүр суол 27-с км-гэр бөх полигонун тутуу салҕанар. Тутуу үлэтэ былырыыҥҥыттан ыытыллар. Барыта этэҥҥэ бардаҕына, быйыл аны күһүн үлэҕэ киириэҕэ. Бүгүн СӨ Бырабыыталыстыбатын бэрэссэдээтэлин 1-кы солбуйааччы Дмитрий Садовников тутуу үлэтин хаамыытын билистэ.

Бырайыак икки түһүмэҕинэн олоххо киирэр. Билигин бастакы түһүмэҕи үмүрүтүү барар. Ол курдук, полигон бары инфраструктурата уонна тобоҕу ыскылааттыыр учаастактар  хабыллаллар. Балар этэҥҥэ оҥоһулуннахтарына, быйыл полигон үлэлиэ.
«Билиҥҥи туругунан тутуу үлэтэ 40 %-на үмүрүйэн турар. Кыраапыктан хаалыы суох эрээри, тутуу үлэтин болдьоҕо биһиэхэ кылгас. Ол иһин, үлэһит илиини уонна тустаах тиэхиньикэлэри эбии наймылаһыахха наада», – диэн Дмитрий Садовников эттэ. Иккис түһүмэх үлэтэ 2024-2028 сс түмүктэниэ. Ити болдьоххо кытаанах тобоҕу ыскылааттыыр үс учаастак тутуллуоҕа. Эбийиэк уопсай сыаната 3,7 млрд солк. Бастакы түһүмэх киэнэ 2,4 млрд солк. тэҥнэһэр.

Дмитрий Садовников маны тэҥэ бөҕү-сыыһы наардыыр ыстаансыйа тутуутун көрдө-иһиттэ. Эбийиэк Бүлүүлүүр суол 8-с км-гэр бу сааскыттан тутуллар. Ыстаансыйа кыамтата сылга 150 тыһ. туоннаҕа тэҥнэһэр. Манна Дьокуускайга тахсар кытаанах тобох 100 %  наарданыаҕа.