Дьокуускайтан Өймөкөөҥҥө икки туонна гуманитарнай көмөнү ыыттылар

Халаантан эмсэҕэлээбит Өймөкөөн улууһун олохтоохторугар Дьокуускайтан өссө эбии икки туонна гуманитарнай көмөнү ыыттылар. Таһаҕаһы Чурапчы түмсүүтүн  өйөбүлүнэн атаардылар диэн киин куорат мэриятын пресс-сулууспата иһитиннэрдэ.

Дьокуускайга гуманитарнай көмөнү хомуйар киин салайааччыта Надежда Федорова Чурапчы түмсүүтүгэр махталын биллэрдэ. «Үөрүүлээҕэ диэн, таһаҕаһы тиэйиигэ бэйэлэрин холобурдарынан көрдөрөн, оҕолорун, сиэннэрин кытыннардылар. Бары бииргэ биһиги  ыарахаттары туоруохпут. Ордук ыарахан балаһыанньаҕа түбэспиттэри өйүүр улахан суолталаах. Биһиги итэҕэйэбит, кыра да көмө сүрэхтэри сылаанньытар уонна түргэнник чөлүгэр түһэргэ эрэли киллэрэр кыахтаах», — диэтэ Надежда Федорова.

Өймөкөөн, Муома уонна Абый улуустарын олохтоохторугар көмөнү хомуйуу Дьокуускай к., Ярославскай уул., 21, 26-с №-дээх оскуола, бастакы этээс аадырыска ыытыллар.

Сибээстэһэр төлөпүөн нүөмэрэ +7 924 760-54-30 (Федорова Надежда Петровна). Халаантан эмсэҕэлээбит олохтоохторго анаан гуманитарнай көмөнү хомуйар пуун киин куорат баһылыга Евгений Григорьев сорудаҕынан Дьокуускайга от ыйын 21 күнүттэн үлэлиир. Ону таһынан, киин куораттан Өймөкөөн улууһугар чөлүгэр түһэрии үлэлэригэр көмөлөһө мэрия үлэһиттэрин мобильнай бөлөҕө ыытылынна.