Дьокуускайтан Ньурбаҕа «Кыайыы уота» айаннаата

Ньурбаҕа атырдьах ыйын 28 күнүгэр, Аан дойду иккис сэриитэ түмүктэммит күнүн иннинэ, бэлиэ түгэн буолла.

Дьокуускай куорат Кыайыы болуоссатын мэҥэ уотуттан Ньурбаҕа диэри «Кыайыы уота» айаҥҥа турунна. Ньурбаҕа «Кыайыы Уота» тиийдэҕинэ, Сэбиэскэй Сойуус Дьоруойу, майор Н.Н.Чусовской төрөөбүт нэһилиэгиттэн — Антоновкаттан балаҕан ыйын 3 күнүттэн саҕалаан Ньурба улууһун бары нэһилиэктэрин кэрийиэхтэрэ.

«Улуу Кыайыыны уоттаах сэрии толоонугар уонна тыылга уһансыбыт аҕа көлүөнэ дьоруойдуу хорсун быһыытын үйэтитэн, кинилэр холобурдарыгар оҕону-ыччаты патриотическай тыыҥҥа иитэр хабаннаах үгүс үлэ ыытыллыаҕа. Ким да умнуллубат, туох да умнуллубат!»,  — диэн Ньурба улууһун дьокутааттарын Сэбиэтин ТГ-ханаала иһитиннэрэр.

Санаттахха, тэрээһин Кыайыы 80 сылын көрсө «Кыайыы уотун эстафетата» диэн патриотическай аахсыйа чэрчитинэн ыытыллар. Саха сирин бары муниципальнай тэриллиилэригэр ыытыллар эстафетаны көҕүлээччинэн Ил Дархана Айсен Николаев буолар.