Дьокуускайтан Зырянкаҕа рейстэри тохтоттулар

«Полярные авиалинии» авиахампаанньа балаҕан ыйын 12 күнүгэр көтөр-түһэр балаһалары уу ылан, Дьокуускайтан Зырянкаҕа маршрутунан рейстэри тохтотто.

Зырянка аэропорда Ан-24 уонна Ан-26 салгын суудуналарын көрсөр кыаҕа суох диэн хампаанньаҕа иһитиннэрдилэр. «Пассажирдарга рейстэр тохтотуллубуттарын туһунан биллэрдилэр. Сорох пассажирдар гостиницаҕа киллэрилиннилэр. Рейстэри толоруу туһунан быһаарыы «Хоту сир аэропортара» ФКП иһитиннэриитинэн сарсын, балаҕан ыйын 13 күнүгэр биллиэҕэ», — диэн дьону таһар-тиэйэр сулууспатыгар бэлиэтээтилэр.

Балаҕан ыйын 11 күнүгэр Илин-Сибиир тырааныспарын борокуратууратыгар иһитиннэрбиттэринэн, Зырянка аэропордугар түһэр-көтөр балаһаны уу ылбыт чахчытынан бэрэбиэркэ тэрилиннэ. Борокуратуура чахчыларынан, Халыма ГРЭС-кэ уу ыыппыт төрүөтүнэн түһэр-көтөр балаһаны уу ылбыта билиннэ.