Дьол уйата — дьиэ кэргэммит! Иэримэ дьиэбит — таптал кута!

Мукучу нэһилиэгин элбэх оҕолоох дьиэ кэргэттэрин, түөлбэлэринэн хомуллубут хаартыскаларынан слайданы долгуйа көрөөт, «Дьоллоох дьиэ кэргэн» Аан дойдутааҕы дьиэ кэргэн күнүгэр анаммыт эҕэрдэ кэнсиэри ыытааччылар — эдэр ийэ Ирина Находкина икки эмдэй-сэмдэй уолаттарынаан Сашалыын, Сергейдыын күндү көрөөччүлэрин эҕэрдэлии көрүстүлэр.

Кэнсиэри «Кэнчээри» уһуйаан иитиллээччилэрэ Алина Стрекаловская «Мин оҕо садым» ырыатын бэлэх уунан эҕэрдэлээтэ, ону тэҥэ бэлэмнэнии бөлөх иитиллээччилэрэ «Уһуйаан уйата» ырыаларынан, Улуу Кыайыы 80 сылынан «Встанем» үҥкүүлэринэн киэргэттилэр. Вероника, Тагар Шагдуевтар «Саһыл уонна бөрө» үгэни бэрт интэриэһинэйдик толордулар. Лазаревтар, Сидоровтар, Кычкиннар, Протопоповтар дьиэ кэргэттэр мааныга кэтэр таҥаһы, сахалыы араас быһыылаах халадаайдары, симэхтэри, иһиттэри, дэйбиирдэри, ону тэҥэ таҥаска бэрт сиэдэрэй дириҥ ис хоһоонноох уруһуйдаах футболкалары, аныгылыы симэхтэри кэтэн көрдөрдүлэр. Бииртэн биир ураты талааннаах дьиэ кэргэттэр ийэлэрэ тикпит, оһуор-мандар аспыт киэргэллэрин бар дьон көрөн сөҕүөн сөхтө. Ульяна Петровна Гаврильева сиэнинээн Руслан Быкалыровтыын көрдөөх сыаҥкаларынан, Анна Афанасьевна Иванова сиэнинээн Кеша Ивановтуун «Өлүөнэ эбэккэм» ырыаларынан, Дайаана Новикова «Ветер войны» Степан Кадашников хоһоонун ааҕан көрөөччү кэрэхсэбилин ыллылар. Маны тэҥэ Анна Афанасьевна Саввинова улахан кыыһа Виктория Германовналыын, сиэннэрэ Кристина, Карина буолан, Хотугулуу үҥкүүнэн бэлиэ күн үөрүүтүн үксэттилэр, көрөөччүлэр үҥкүү саҕаланыаҕыттан дохсун ытыс тыаһынан доҕуһуоллаатылар. Эдэр ийэ Айыына Адольфовна Андросова кыыһынаан Беллалыын эрчимнээх үҥкүүлэринэн сөхтөрдүлэр, көрөөччү биһирээбитин биллэрэн уҕараабат ытыс тыаһын бэлэхтээтэ. «Дэриэбинэчээн» норуот тыйаатырын артыыстара көрдөөх сыаҥкаларынан үөрүү кыымын ыһан көрү-нары көҕүлүттэн туттулар.

Аан дойдутааҕы дьиэ кэргэн күнүгэр кыттыбыт талааннаах дьиэ кэргэттэрбитигэр махтанабыт. Бу киэһэ дьиэ кэргэттэр хас биирдиилэрэ ураты дьоҕурдарын арыйан, оҕолору кыра эрдэхтэриттэн сыанаҕа тутта-хапта сылдьыыга уһуйан, кимиэхэ эрэ баҕа санаата туолар ураты тыыннаах кэнсиэр буолбутун кэлбит дьон бэлиэтээтэ. Мэлдьи бу курдук кэрэни кэрэхсиир санааҕыт, талба талааҥҥыт сайдан, тупсан истин!

Дьиэ кэргэҥҥит бигэ тирэхтээх, чэгиэн туруктаах буоллун! Бар дьоммутугар дьиэ кэргэҥҥит эйгэтин харыстааҥ!

Тапталгыт суоһунан хаххалааҥ!

Кэрэни ыралааҥ!

Кэскили түстээҥ диэн баҕара хаалабыт.

 

Вера Прокопьева, Мукучу, Кэбээйи.