Долганнар түөлбэлээн олорор сирдэригэр талааннаах ыалы сэргээтим

Кылтасов Дмитрий Николаевич  төрөппүттэригэр  ахсыс оҕонон күн сирин көрбүтэ. Төрөппүттэрэ  удьуор туундара дьоно этилэр.

Дмитрий оскуоланы 1989  сыллаахха Үрүҥ Хайаҕа бүтэрэн баран, Бурятияҕа аармыйаҕа  икки сыл сулууспалаабыта. Аармыйаттан  кэлэн баран,  уонча сыл нефтебаазаҕа операторынан үлэлээбитэ.

Олоҕун аргыһын Марианна Афанасьевнаны көрсөн, түөрт оҕону төрөтөн, Үрүҥ Хайа дьоһун, мааны ыала буолан олороллор. Иккиэн оҕо уһуйаанын тутаах дьоно:  Марианна иитээччи көмөлөһөөччүтүнэн, Миитэрэй харабылынан үлэлииллэр.

Миитэрэй айылҕа киһитэ —  сайын Куочаҕа, Үөлэҕэ мотуорунан баран, балыктыыллар, куска-хааска сылдьаллар. Миитэрэй мас ууһа буолан, сайын уонна күһүн доҕотторун кытары элбэх дьиэни туттулар, өрөмүөннээтилэр, түннүктэргэ, күүлэлэргэ оһуор-мандар оҥороллор.

Быраата Ньукуулуун «Байанай ыһыаҕын” сиригэр сэргэлэри ойуулаан, оһуордаан, киэргэтэн туруорбуттара. Бырааһынньыкка былакааттары,  киэргэллэри уруһуйдуур буолан, ыҥырыкка сылдьар. Миитэрэй үксүгэр  айылҕаны уруһуйдуур. 2008 с. улуустааҕы ыччат бырааһынньыгар Грамотанан бэлиэтэммитэ, Дьиэ кэргэн сылыгар ыытыллыбыт улахан тэрээһиҥҥэ “Көһө сылдьар дьиэ кэргэн” номинацияҕа бастакы миэстэни ылбыттара. Быыстапкаҕа  уруһуйдарынан анал   дипломунан наҕараадаламмыта.  Уруһуйдара үгүс ыал дьиэтигэр ыйанан турара көрүөххэ олус үчүгэй. Кини уруһуйдуурун сэргэ,  маһынан, муоһунан кыһан оҥорор, этэрбэс улларар, уһанар мастарыскыайдаах.

Анаабыр улууһугар дьонугар-сэргэтигэр «Миитээс» диэн аатынан биллэн, улуус дьоно этэрбэстэрин уллаттара киниэхэ  ыыталлар.

Кылтасовтар оҕолоро — үлэ-үөрэх дьоно. Диана Н.Г.Чернышевскай аатынан Бүлүүтээҕи профессиональнай-педагогическай кэллиэһи бүтэрэн,   иитээччи идэтин баһылаата, «Уохтала» үҥкүү ансаамбылыгар дьарыктаммыта.

Оксана  Арктикатааҕы судаарыстыбаннай агротехнологическай университекка юрист үөрэҕэр үөрэнэр, успуордунан дьарыктанар: илии-атах  оонньуутугар СӨ успуордун маастара.

 Давид П.И.Дудкин аатынан сибээс уонна информационнай технология кэллиэһигэр үөрэнэр, уруһуйдуурун сөбүлүүр.

Онтон саамай кыралара Кирилл  – 3-с кылаас үөрэнээччитэ.

Ити курдук, Кылтасовтар Анаабырга,  ыраах муора кытыытыгар Үрүҥ Хайаҕа чөл олоҕу тутуһан,  сүрүн болҕомтолорун оҕо иитиитигэр ууран,   үлэни өрө тутан, ону тэҥэ барытыгар талааннаах буолан, дьоһун-мааны ыал буолан олороллоруттан үөрэбит.

Галина БОРИСОВА-ТОЛБООНО