Күрүө туппут хаһаайыны суут көтүрэригэр модьуйда

Дьокуускайга Сэргэлээххэ  уһаайбалаах хаһаайын ыаллыы олорор киһитэ кинилэр  ааһар суолларын бүөлээн, олбуор аанын туппутун туһунан суукка үҥсүбүт. Бу бүтэй (аан боруотата) тутуллан, үҥсээччи бэйэтин уһаайбатыгар киирэр суола сабыллыбыт.

Хааччах оҥорон дьону эрэйдээбит хаһаайыҥҥа суут оҥоһуллубут олбуор аанын  көтүрэригэр уонна бэйэтин уһаайбатын кыраныыссатыгар илдьэн, биэс күн иһигэр туруорарыгар дьаһайбыт.Онуоха бүтэй туруорбут хаһаайын суут ирдэбилин ылымматах. Кини этэринэн, ити аан  турбутун да кэннэ икки уһаайба хаһаайыттарын бырааптара кэһиллибэтэҕин ыйбыт. Ол курдук боруотанан күрүөлэммит сир ханна да тиэрдибэт сир буоларын эппит. Бу боруота кини эрэ учаастагар тиэрдэр кыахтааҕын быһаарбыт.

Оттон ыаллыы олорор суукка үҥсүбүт киһи этэринэн, үүнэн турар улахан мастар мэһэйдииллэринэн суол кыараҕаһынан сылдьар суол хааччахтаммыт.  Суукка эппиэттээччи этэринэн, суут эспэртиисэтэ быһаарбытынан, үҥсүбүт хаһаайын учаастагар атын суолунан кэлэр кыахтаах эбит. Онон суут ирдэбилин тохтоторугар көрдөспүт. Муниципальнай управление иниспиэксиэйэтэ хонтуруоллуур надзор тэрээһинин түмүгүнэн, уһаайбалар икки ардыларынааҕы күрүөлэммит суол судаарыстабаннай бас билии буолара уонна межевание бырайыагынан ыйыллыбыт ааһар суол уопсай туһаныллар сир быһыытынан билиниллибит. Онон күрүөлээн боруота туруорбут хаһаайыҥҥа ыйытыыта суох ылан күрөлээбит сирин босхолууругар сэрэтии кэлбит. Ол эрээри хаһаайын бу сэрэтиини эмиэ толорботох. Кини этэринэн, ыаллыы олорор хаһаайын атын сиринэн сылдьар кыахтаах эбит.

Суут уурааҕынан, боруоталаах хаһаайын ый устата оҥорбут күрүөтүн көтүрэригэр уонна сир учаастагын кыраныыссатын сөргүтэригэр ирдэбил түһэрбиттэр. Маны сэргэ, уопсай туһаныллар сири күрүөлүүр дьайыылары оҥорорун боппуттар уонна суут ирдэбилин толоруор диэри  күн ахсын 700-түү  cолкуобайы тутарга уураахтаабыттар.

Боруоталаах хаһаайын маны кытта сөбүлэспэтэх уонна СӨ Үрдүкү суутугар үҥсүбүт. Үрдүкү суут дьыала матырыйаалын үөрэтэн баран Дьокуускайдааҕы суут уурааҕын сөптөөҕүнэн аахпыт уонна суут быһаарыытын оннунан хаалларбыт. Быһаарыы сокуоннай күүһүгэр киирбитин туһунан СӨ Үрдүкү суутун пресс-сулууспата иһитиннэрдэ.