Дьон дьиэтин туора дьоҥҥо куортамҥа биэрэн

Арассыыйа ИДьМ “Дьокуускайдааҕы” МУ 4 №-дээх полиция отделын дьуһуурунай чааһыгар кыбартыыраны куортамҥа ылаары албыннатан 72 тыһыынчатын сүтэрбит дьахтартан сайабылыанньа киирбит. Бу туһунан СӨ ИДьМ суруйар.

Суһал ирдэбил түмүгэр урут сууттана сылдьыбыт Ленскэй оройуонун олохтооҕо буруйдаах буолара биллибит.

Бу эр киһи кыбартыыра куортамнаабыт уонна онтукатын куортамныырга биллэрии таһаарбыт. Албын биллэриигэ бу дьахтар киирэн биэрбит. Буруйдаах эр киһи  дьиэ хаһаайынын быһыытынан киниэхэ 72 тыһыынча солкуобай кээмэйдээх харчыны урутаан төлүүрүгэр көрдөспүт. Дьахтар сөбүлэһэн, киниэхэ харчытын ыыппыт. Кэтэх санаалаах эр киһи кыбартыыра күлүүһүн биэрэн баран, тахсан барбыт. Сотору кэминэн дьиҥнээх бас билээчилэр кэлбиттэр, кинилэр бас билэр дьиэлэрэ үһүс киһиэхэ куортамнаммытын олох да билбэккэ сылдьыбыттар.

Манна олоҕуран.  РФ Холуобунай кодексын 159 ыст 2 ч. “Түөкүннээһин” диэн дьыала көбүтүллүбүт. Ол быһыытынан 5 сылга диэри көҥүлэ да быһыллыан сөп.